CEBU CITY, Cebu, January 5 (PIA) -- Gi-anunsyo sa Department of Social Welfare and Development (DSWD 7) ang pagpadayon sa issuance sa Guarantee Letters (GLs) ubos sa Assistance to Individuals in Crisis Situation (AICS) niadtong Enero 2, 2024.
Kini human temporaryong gisuspenso niadtong Disyembre 2023, alang sa tinuig nga liquidation ug ang pag-kumpleto sa pagbayad sa mga service providers nga mihatag na og tabang o assistance ngadto sa mga benepisyaryo.
Ang Guarantee Letter (GL) dokumento nga gi-issue sa DSWD alang sa benepisyaryo pagpasalig sa service providers sa bayad sa serbisyo alang sa kliyente, ilabina ang ilang gasto sa pagpatambal ug pagpalubong.
Si DSWD Assistant Secretary for Legislative Affairs Irene Dumlao, kinsa mao usab ang co-spokesperson sa ahensya, niingon nga ang mga kliyente mahimo nang moadto sa lain-laing DSWD Field Offices aron maproseso ang ilang mga hangyo para sa GL.
“Our kababayans who are experiencing difficult circumstances and needing assistance for their medical, and funeral expenses, may now avail of and request for a guarantee letter from DSWD (Ang atong mga kababayan nga nakasinati ug lisod nga mga kahimtang ug nanginahanglan ug tabang para sa ilang gasto sa pagpatambal, ug lubong, mahimo nang maka-avail ug makapangayo ug guarantee letter gikan sa DSWD),” tumbok ni Dumlao.
Gipahinumdoman ni Dumlao ang publiko sa pagsiguro nga kompleto ang ilang mga dokumento ug aduna silay valid identification cards alang sa mas paspas nga pagproseso sa ilang mga hangyo.
“The amount of assistance under GL is based on the assessment of a social worker through interview and document review (Ang kantidad sa tabang ubos sa GL gibase sa pagtimbang-timbang sa usa ka social worker pinaagi sa interbyu ug pagrepaso sa dokumento),” tumbok sa DSWD co-spokesperson.
Samtang gipadayon ang pag-isyu sa GL, gipahibalo usab sa DSWD nga temporaryo nga gisuspenso ang paghatag sa outright cash sa mga kliyente sugod niadtong Enero 2 samtang naghulat sa pag-download sa pundo gikan sa Department of Budget and Management (DBM).
Gipasabot sa DSWD na ang pagsuspenso sa probisyon sa outright cash ubos sa AICS gihimo sa pagsugod sa fiscal year samtang naghulat sa pag-download sa budget sa DSWD base sa probisyon sa General Appropriations Act o GAA.
Mahitungod niini gitambagan usab sa DSWD ang publiko nga maghulat og dugang nga anunsyo sa ilang website ug social media accounts kung kanus-a ipadayon ang pagproseso ug pag-release sa outright cash.
Ang AICS ubos sa Protective Services Program sa departamento nga naghatag og pinansyal ug materyal nga tabang, psychosocial nga suporta, ug referral nga mga serbisyo ngadto sa anaa sa krisis nga mga indibidwal ug ilang mga pamilya, ingon sa gisusi sa mga social worker. (JAT/PIA 7)
