MANILA, January 9 (PIA) -- Mopahigayon ang Department of Interior and Local Government (DILG)  og quarterly recognition sa mga Local Government Units (LGUs) nga epektibong mopatuman sa Kalinga at Inisyatiba Para Sa Malinis na Bayan (KALINISAN) Program ni Presidente Ferdinand R. Marcos Jr.

Ang KALINISAN program gilusad niadtong Enero 6, pinaagi sa national simultaneous clean-up drive sa Baseco Compound sa Manila, dungan sa pag-obserbar sa tinuig nga Community Development Day.

Sa iyang mensahe, si DILG Kalihim Benjamin Abalos niingon nga ilang sigurohon nga mamonitor ang performance sa mga 42,000 ka barangay sa tibuok nasud.

“Sa DILG, imo-monitor namin ang performance ng bawat barangay on a monthly basis, and quarlterly basis magkakaroon ng awarding ito…Tututukan talaga namin ito,” matud pa niini.

Si Abalos miingon nga ang programa magtugot sa mga Pilipino sa pagpakita sa diwa sa pagboluntaryo samtang nagsiguro sa luwas ug himsog nga komunidad nga puy-an.

Gi-awhag usab niya ang tanang local chief executives sa pagpasar sa ilang tagsa-tagsa ka ordinansa nga magkinahanglan og community service sa mga indibidwal nga masakpang maglabay og basura.

Si Abalos nanghinaot nga mas daghang Pilipino ang makabaton og disiplina nga mahimong mas responsable sa paglabay sa ilang mga basura.

“Sana ma-achieve natin na hindi na kailangan mahuli, dapat may disiplina. Dapat may disiplina ang bawat isa na hindi ka na sitahin,” matud pa sa kalihim.

Ang national simultaneous clean-up drive gisalmotan sa nagkalain-laing ahensya sa nasudnong kagamhanan ug LGUs sa tibuok nasod. (ECB/PIA7 Bohol)