SYUDAD SANG ILOILO -- Ginpasidunggan sang probinsya sang Guimaras ang mga most child-friendly barangays sa isa ka seremonya sang Child Friendly Local Governance (CFLG) sang nagligad nga Disyembre 27.

Ginkilala ang Barangay Agsanayan sa banwa sang Buenavista bilang Most Child-Friendly Barangay kag nakabaton sang plake kag premyo nga P150,000.00.

Ang ini nga barangay ang ginhatagan man sang padya bangud sa talalupangdon sini nga planning kag policy formulation, resource allocation, and documentation.

Sa pihak nga bahin, nangin runner-up naman ang Barangay Tanag kag nakaangkon sang P100,000.00.

Gin-eksamin man ang mga barangay kasubong sang Balcon Maravilla, Buluangan, kag Espinosa sa banwa sang Jordan; La Paz, Poblacion, San Roque, kag Tando sa banwa sang Nueva Valencia; Cabano, San Enrique, Sebario kag Suclaran naman sa banwa sang San Lorenzo.

Nakabaton sang P5,000.00 kag plake ang kutob naman sa mga barangay nga wala nagdaog.  

Ginkilala man ang Barangay Ayangan sang Sibunag bilang Best in Health and Nutrition kag Best Practice in Innovation/Implementation Special Awards.

Ang Barangay Tanag nakabaton man sang special awards nga nalakipan sang Best in Education, Best in Institution Building, kag Best in Child Participation.

Ang ini nga mga kabarangayan ang gin-eksamin sa bahin sang planning and policy formulation, resource allocation, service delivery, institution building, child participation, kag community participation.

Para naman kay Governor JC Rahman Nava, nagapadayon ang probinsya sang Guimaras sa pag-uswag sa patag sang hilikuton tuhoy sa mga kabataan.

"We made big strides as far as child friendly movement is concerned not only locally but as well as on the national level. Indi langu-langu ang pagpaninguha sang mga barangay kag kabanwahanan para ma-achieve ang status subong sa Guimaras (The effort of the barangays and municipalities is not a joke especially in achieving the current status of Guiamaras )," pahayag ni Gov. Nava. (AAL/LMLE/PIA Iloilo/Guimaras PIO)