DAVAO CITY (PIA) -- Gitunol sa Bureau of Fisheries and Aquatic Resources (BFAR) sa Rehiyon XI ang usa ka commercial fishing vessel o lantangan nga nagkantidad og P8 milyon ngadto sa Don Enrique Lopez Fisherfolk Association (DELSFA) sa Mati City, Davao Oriental.

Gipahigayon ang turn over ceremony ug blessing kaniadtong Enero 17, 2024 sa Mati City Fishport Complex nga gipangulohan sa BFAR XI ug Mayor Michelle Nakpil Rabat.

Dakong pasalamat ni Rabat sa BFAR XI sa paghatag of donasyon sa mga mangingisda sa Don Enrique Lopez Fisherfolks.

Gawas sa lantangan, aduna usab gihatag ang BFAR XI ug ang lokal nga panggamhanan sa Mati City nga dugang unom ka pakura kon gagmay nga baroto ug uban pang gamit pandagat.

Giawhag ni Rabat ang mga benepisyaryo nga ampingan ang donasyon nga gihatag kanila sa gobyerno, aron mas mulungtad kini, ug mas mapahimuslan sa mga mangingisda ug sa tibuok katawhan sa Mati.

Nanghinaot ang local government sa Mati og maabundang pangisda sa tanang fisherfolk cooperatives nga dakong tabang sa pagpalambo sa ekonomiya sa dakbayan. (ETI/ PIA XI/Mati City LGU)