MALAYBALAY CITY (PIA)–Si Marina “Lola Maring” Marquez Encabo, 101 years old, taga Barangay Managok, Malaybalay City, gihatagan ni Mayor Jay Warren Pabillaran og P100,000 subay sa Malaybalay City Ordinance No. 988, series of 2021.

Si Lola Marina “Maring” Encabo ang pinakaunang ‘centenarian’ nga nakadawat sa one-time-incentive nga P100,000 gikan sa syudad sa Malaybalay, sukad gimugna ang ordinansa nga pasidunggan ang mga lumolupyo nga naka-abot sa edad nga usa ka gatos ka tuig kon 100 years old.

Ang maong ordinansa nag-ila ug naghatag insentibo niadtong mga sentenaryan sa dakbayan nga gipundohan gikan sa Gender and Development (GAD) nga programa sa local government.

Ang P100,000 nga insentibo nagpakita sa pag-ila sa syudad sa Malaybalay ngadto sa mga Senior Citizen tungod sa ilang dako’ng tabang ug mahinungdanong kontribusyon.

Gihatagan usab si Lola Marina Encabo sa Certificate of Recognition isip pasalamat ug pasidungog tungod kay talagsa ra ang makakab-ot sa 100 ka tuig nga edad.

Gi-anak siya niadtong Marso 16, 1922.

Niadtong tuig 2022, bulan sa Septyembre, ang Department of Social Welfare and Development kon DSWD national office mihatag na kang Lola Marina Encabo ug P100,000 subay sa Republic Act 10868 kon Centenarians Act of 2016. Kining balaod naghatag gihapon og pasidungog ug nag-ila sa mga Pilipino nga nakakab-ot sa ika-100 ang panuigon bisan pa man og sila nagpuyo sa Pilipinas o sa laing nasud.

Busa kining nadawat ni Lola Marina nga P100,000 karong bag-o, ikaduha na kini nga hugna tungod kay gikan man kini sa Malaybalay City government.

Si Mayor Jay Warren Pabillaran, kauban ang personahe sa Office of the Senior Citizen Affairs ug sa City Social Welfare and Development Office, mipresenta sa maong insentibo ngadto kang Lola Marina Encabo sa iyang pinuy-anan sa Purok 3, Barangay Managok, Malaybalay City, niadtong Enero 10, ning tuig. (PIA 10 Bukidnon)