TAGBILARAN CITY, Bohol, January 20 (PIA) -- Miumento og 367% ang kantidad sa illegal nga drugas nga shabu nga nasakmit sa mga tinugyanan sa 2023 kon itandi sa 2022.
Hinuon, wala kini magpasabut nga mas migrabe ang suliran sa illegal nga drugas, hinuon, mas nahimong aktibo ang mga tinugyanan sa pagpuhag sa mga nagpatigayon sa illegal nga buhat.
Kini maoy unod sa gibutyag ni Intelligence Officer Ma. Chona Egam, didto sa hiniusang tigum sa Provincial Anti Drug Abuse Council (PADAC) ug sa Provincial Peace and Order Council (PPOC) sa milabay nga semana.
Ang saysay ni Egam, kinsa maoy representante sa Philippine Drug Enforcement Agency (PDEA), mihaum usab sa taho sa kapolisan subay sa gibatbat ni Bohol Police Provincial Director Lorenzo Batuan atul sa nahisgutan nga tigum.
Sa taho sa Kampo Dagohoy pinaagi ni Batuan, gikan sa Enero ngadto sa Disyembre 2022, kinatibuk-ang 3,825.68 ka gramos nga shabu ang nasakmit sa mga tinugyanan gikan sa mga nadakpan sa ilang mga operasyon.
Pagka sunod tuig, 2023, ang kanhi kapin sa tulo ka kilo nga shabu, mongbusdik na ngadto sa 14,060.24.
Ug gikan sa P26,014.66 nga gibanabana ng bugti sa nasignit nga epekto sa 2022, ming lobo na kini ngadto sa P95,609,632 sumala sa banabana nga street value niini subay sa talaan sa Dangerous Drugs Board.
Makit-an usab sa susamang taho nga gibatbat sa Kampo Dagohoy nga niadtong 2022, 399 lamang ka operasyon ang gihimo sa mga tinugyanan, samtang ming-abut sa 630 ang nahimo sa hiniusang buhat sa mga tinugyanan sa 2023, maud ni Batuan.
Napalakra usab ang diperensya sa kadaghanon sa mga suspetsado nga nasakpan sa duh aka tuig.
Sa 2022, sa 399 ka operasyon, 448 ka mga suspetsado ang nasignit, samtang sa 2023, sa 630 ka operasyon sa mga tinugyanan batok sa illegal nga drugas ug patigayon niini, 682 ka mga suspetsado ang nasignit.
Sa laing bahin, sa patigayun sa marijuana, sa 2022, nakasikop ang mga tinugyanan sa .30 gramso nga pinaugang dahon, samtang 21 gramos usab ang nasakmit sa 2023.
Niini, nagkahiusa ang mga tinugyanan sa pagpasalig nga mas epektibo ang ilang operasyon ug kampanya karon kay sa nanglabay nga mga katuigan, ug gani, anaa na sa 60 porsyento sa mga kabarangayan sa Bohol ang nalimasan na sa buling sa illegal nga drugas, subay sa susamang taho. (RAHC/PIA Bohol)
