BAROY, Lanao del Norte (PIA) -- Giinagurahan sa lokal nga kagamhanan dinhi ang Baybay Sunset Café, A-Houses, ug Mangrove Park nga nahimutang sa Barangay San Juan.
Makita sa maong suruyanan ang nindot nga pwesto aron matagamtam ang matahum nga pagsalop sa adlaw sa Panguil Bay.
Ang mga bakhaw nga naglibot sa lugar nagpamatuod nga kini usa ka perpekto nga lugar sa pagpahayahay ug pagdayeg sa katahum sa kinaiyahan.
Adunay mga cottage, floating cottage, ug usa ka café diin ang mga bisita makatilaw sa mga lain-laing ilimnon ug mga pastry taliwala sa makaparepresko nga hangin.
Aduna sab A-house para sa akomodasyon sa mga bisita. Naglinya sab ang mga bakhaw sa agianan padulong niini.
Giimbitar ni Mayor Grelina Mantohac-Lim ang mga katawhan sa pagbisita sa lugar.
“Akong iinvite ang mga katawhan sa lain-laing munispyo nga naa ko gi-rehab sa Barangay San Juan location, sauna seaside na siya. Mao ni sya ang baywalk, karon akong gi-rehab. Hopefully, malipay mo nga nindot kaayo suruyan,” sumala niya.
Gipaambit usab sa mayor ang iyang panglantaw sa pagpatuman og dugang pang income-generating facility sa lungsod. Subay niini, nagpadayon ang mga proyekto para sa kalamboan sa lungsod sama sa pagtukod sa bag-ong merkado, sports complex, village para sa pottery industry, bus terminal, ug town center. (LELA/PIA-10/Lanao del Norte)