BAROY, Lanao del Norte (PIA) -- Gisaulog sa mga residente ang Gini-akan Festival human sa upat ka tuig tungod sa pandemya atol sa pagsaulog sa pista ni Senior Sto. Niño ang patron sa lungsod.
Nailhan ang Baroy isip clay town sa probinsya tungod sa rich deposit sa clay nga makita dinhi nga ginagamit sa pottery.
Ang Gini-akan gikan sa rootword nga “gi-ok” nga mao ang pamaagi sa pag-refine sa clay pinaagi sa pagtapak niini.
Gibutyag ni Mayor Grelina Mantohac-Lim ang plano sa pag-develop ug village para sa pottery industry aron maka-attract og investors.
“Hopefully, kung panalinganan mi sa among Sr. Sto Niño, amo mapalambo, magpahimo mi ug village. Mao na akong gihunahuna. Dili ra kana, maghimo mi mga craft,” sumala niya.
Gidagsa sa mga residente ug turista ang maong selebrasyon ilabina na ang invitational Gini-akan Festival street dancing competition nga gisalmutan sa upat ka contingent.
Midaog isip grand champion sa kumpetisyon ang Lanao del Norte National Comprehensive High School (LNNCHS) ug nakuha ang P100,000 cash prize. Nakuha sab nila ang Best Festival Queen award.
Samtang, 1st runner up ang contingent gikan sa lungsod sa Linamon ug nakadaog og P75,000 cash prize, 2nd runner up ang Sto. Niño Academy ug nakadaog og P50,000 cash prize. Nakadawat sab og P20,000 pesos nga consolation prize ang Barangay Magpatao sa lungsod sa Lala.
“Syempre happy kaayo ug dako kaayo akong pasalamat nga na-experience napod namo ni karon. Happy ko nga gi-represent namo ang amoang school,” sumala ni Lyca Sarao sa LNNCHS, ang gikoronahan isip Best Festival Queen.
Samtang, nipadayag og pasalamat sa kahigayonan nga makarepresentar ug makasalmot sa kalihokan si Reyna Montesa, estudyante sa Sto. Niño Academy, aron maipakita ang iyang debosyon kang Sr. Sto. Niño. (LELA/PIA-10/Lanao del Norte)
