TAGBILARAN CITY, Bohol, January 30 (PIA) -- Ang mga manananom og balanghoy sa lungsod sa Carmen nga sakop sa PNBKG Multipurpose Cooperative nadasig sa pag-apil balik sa produksyon sa balanghoy uban sa suporta sa Department of Agriculture- Philippine Rural Development Project (PRDP).

Kini nga kadasig maoy nakapabayaw sa mga nananom sa pagdawat sa duha ka mga sakyanan – usa ka hauling truck ug usa ka traktora nga adunay kinatibuk-ang kantidad nga P 6.23 milyon nga suporta sa Bohol Cassava Production Consolidation Processing and Marketing Enterprise, usa ka subproject nga gipondohan ubos sa IREAP Component sa DA-PRDP.

Si Fermina Genson, Manager sa PNBKGB Multipurpose Cooperative nipaambit nga ang mga cassava growers naghinam-hinam nga makasugod pag-usab sa ilang cassava production ug karon nalipay kaayo sa proyekto, usa ka damgo nga natuman sa grupo.

“The farmers are very happy seeing the vehicles. We have started to use it in the land preparation for the 200 farmers. It [tractor] sped-up things unlike the use of carabao in plowing which is very laborious and time-consuming. (Nalipay kaayo ang mga mag-uuma nga nakakita sa mga sakyanan. Gisugdan na namo ang paggamit niini sa pag-andam sa yuta alang sa 200 ka mag-uuma. Kini nagpadali sa mga butang dili sama sa paggamit sa kabaw sa pagdaro nga hago kaayo ug makahurot sa panahon),” matud pa ni Fermina.

Apil usab sa subproject intervention mao ang paghiwa sa mga root crops o “bangkong” (bisaya local term) nga gitumong sa PRDP.

Kasagaran, mas taas ang panahon aron mahuman ang “bangkong”, matod pa ni Fermina.

Iyang gidugang nga ang proyekto mahinungdanon kaayo sa mga mag-uuma ug ang pakigtambayayong sa PRDP maghatag og kahigayonan alang sa pinansyal nga pagtubo ug lig-on nga kita sa mga mag-uuma.

Ang PNBKGB naghimo og laraw alang sa hapsay nga pagpatuman sa proyekto samtang gikonsiderar pag-ayo ang ilang mga nakat-onan ug mga kasinatian nga ilang nasinati sa usa ka pribadong pabrika.

Pinaagi sa negosyo, malaumon sila nga mawagtang ang dili maayo nga mga gawi sa pagpanguma pinaagi sa hugot nga pagmonitor sa mga kalihokan sa pagpanguma aron maapil ang husto nga kantidad sa paggamit sa abono.

Ang Carmen usa sa mga lungsod nga nanguna sa pagprodyus sa balanghoy sa Bohol ug pinuy-anan sa daghang mga tigpananom og balanghoy. (ecb/PIA7-Bohol)