SYUDAD SANG ILOILO --  Naglab-ot sa P308,185 nga balor sang donasyon ang nabaton sang gobyerno probinsyal sang Iloilo nagikan sa Regional Juvenile Justice Welfare Council (RJJWC).

Nalakip sa ini nga donasyon ang mga kagamitan kaangay sang laptop, printer, projector, smart TV, CCTV system, mga kagamitan pangmusika; baking tools kag materyal, personal care hygiene kits, kag bulig para sa emerhensya kag kalamidad.

Ginpangunahan ni Department of Social Welfare and Development Office (DSWD) 6 regional director Atty. Carmeo Nochete kag RJJWC Secretariat ang seremonya sa paghatag sang bulig nga ginbaton naman ni Provincial Social Welfare and Development Office (PSWDO) chief Sarah Barayuga.

Nagatanyag man sang mga programa kag serbisyo ang Balay Pagbag-o kasubong sang case management, family-based services, homelife and health services, ecumenical and interfaith programs, developmental services, livelihood and entrepreneurial programs, educational services, psychosocial services, kag recreation kag iban pa nga mga hilikuton sa bahin sang kultura.

Ginlunsar ang Balay Pagbag-o sang Nobyembre 2023 kag napahamtang sa Ramon Tabiana Memorial District Hospital Compound sa banwa sang Cabatuan. (AAL/LMLE/PIA Iloilo/Balita Halin sa Kapitolyo)