SYUDAD SANG ILOILO -- Bukas sa karon ang bag-ong lunsar nga Innovation Hub (iHub) sa mga estudyante, startups, innovators, kag stakeholders nga may tuyo sa pagpasanyog sang mga ideya, inspirar sang pagbinuligay kag pagpakigbahin sang impormasyon.

Napahamtang ang iHub sa Guimaras State University (GSU) Main Campus-Buenavista kag ini ang ginapangunahan sang Iloilo Science and Technology University (ISAT U) paagi sa consortium nila nga Unified Movement in Western Visayas to Accelerate Startup and Spin-off Development (UMWAD) Western Visayas, kaupod man ang Department of Science and Technology (DOST) 6, (GSU), kag gobyerno probinsyal sang Guimaras. 

Ang ini nga pondo natigana man sa pagkuha sang Project Assistant nga mangin responsible sa pag set-up kag mentenar sang lugar kag pagbakal sang mga kagamitan kag mga kinahanglanon sini.

Ginpaalintun man ni Asuelo ang importansya sang pagpakig-upod sa mga state universities and colleges (SUCs) sa pagpatukod sang iHub.

“SUCs often possess extensive infrastructure and facilities, enabling them to offer an available building that was eventually utilized and repurposed into the i-Hub. This approach maximized existing resources, reduced costs, and promoted sustainable development,” sambit ni Asuelo.

Ginpakigbahin man sini ang mga katapo sang SUCs nga may nanuhaytuhay nga ihibalo kag ikasarang nga makahatag sang dako nga kontribusyon sa proyekto.

Sa madumduman, ang GSU ang naghatag sang pasilidad sa ISLA Technology Business Incubator (TBI) kun sa diin napahamtang ang iHub. 

Nagsaad man ang DOST sa padayon nga pagbuligay kaupod ang mga ahensya kag institusyon sa pagpatuman sang ini nga proyekto kag paghatag sang teknikal assistance paagi sa training, seminars, kag workshops. (AAL/LMLE/PIA Iloilo)