TAGBILARAN CITY, Bohol, February 12 (PIA) -- Nakadawat ang lalawigan sa Bohol og dul-an sa P77.58-milyon nga kantidad sa mga makinarya sa panguma ubos sa Rice Competitiveness Enhancement Fund-Mechanization Component sa Department of Agriculture.
Ang pagpang-apud-apod niini gipahigayon niadtong Pebrero 2, 2024 didto sa People’s Park covered court sa lungsod sa Trinidad diin si DA-PhilMech Director III Joel V. Dator, DA7 Regional Technical Director Engr. Cirilo Namoc, DA7 Agricultural Program Coordinating Officer for Bohol Roman Dabalos, APCO-Bohol, Provincial Agriculturist Liza M. Quirog ug ni Trinidad Mayor Roberto Cajes mitambong
Atol sa gipahigayong turnover ceremony, ang 67 ka units sa rice machineries gilangkoban sa 2 ka hand tractors, 11 walk-behind rice transplanters, 4 riding-type transplanters, 10 rice precision seeders, 14 rice combine harvester, 15 rice threshers, 8 single-pass rice mill ug rice processing system 1 nga giapilan og 2 units recirculating dryer 6T ug 1 unit multistage rice mill 1.5tph.
Gidawat kini sa 41 ka qualified farmers' cooperatives and associations (FCAs) gikan sa mga lungsod sa Catigbian, Bien Unido, Buenavista, Dagohoy, Danao , Trinidad, Ubay, Alicia, Bilar, Candijay, Carmen, Duero, Mabini, Sierra Bullones ug Valencia.
Si Ramil B. Jumamoy, presidente sa Causwagan Norte Palayamanan Farmer-Partners Association, nipadayag sa iyang kinasingkasing nga pagkalipay sa mga tawo nga nagpaluyo sa maong proyekto.
“Dili ko katuo sa mga panghitabo kay kini nga mga makinarya usa rani ka damgo namo sa una, sa bata pako makita ra ni nako sa TV. Maka tabang jud ni kaayu sa among panguma. Daghang matabangan nga mga asosasyon. Dako kaayu mi og pasalamat sa Department of Agriculture, Philmech RCEF. Sa pag-harvest dili na dako among magasto kay aduna nay mga makinarya, dako kaayung kausaban sa amuang mga farmers. Ang pangandoy namo sauna na tuman ra jud”, matud pa ni Jumamoy.
Gidugang pa ni Jumamoy nga sa panahon sa ting-ani, mo-menos ang gasto sa paggamit sa makinarya nga dakong kausaban sa naandang gawi sa mga mag-uuma.
Ang among pangandoy kaniadto natuman na pinaagi sa maong proyekto sa DA-RCEF. (ECB/PIA7-Bohol)
