TAGBILARAN CITY, Bohol, February 10 (PIA) -- Doble kontribusyon, doble tigum para sa kaugmaon.

Kini ang kinatibuk-an nga unod sa gibatbat sa marketing manager sa Home Development Mutual Fund (HDMF) Bohol, nga kanhing giila sa Pagtutulungan, Ikaw, Bangko, Industriya at Gobyerno (PAG-IBIG Fund) nga si Leonardo Cirujales, didto sa Kapihan sa PIA.

Kini usab subay sa pagtugot Board of Trustees sa ilang 2023-01 nga Regular Board Meeting niadtong Febrero 16, 2023, kanus-a ilang gihukman ang pagpatuman sa umento sa matigum sa matag sakop pinaagi sa usa lamang ka hugna o pag-umento sa  Maximum Fund Salary (MFS) sa 2024, taho ni Cirujales.

Human niini, nasundan dayon sa pag-aprobar sa Senior Management Committee (SMC) sa ilang tigum niadtong Hunto 2023 kanus-a usab ilang gituki ang gabayan sa pagpatuman sa pagpa-umento sa  pundo sa Maximum Fund Salary (MFS) sugod sa Pebrero 2024.

Pinaagi sa Circular No 460, nakabutang didto nga ang maximum fund salary nga gamition sa pagkwenta sa matigum sa trabahante ug sa amo niini, gisaka na gikan sa P5 mil ngadto na sa P10 mil.

Sa laktud nga pagkasulti, gikan sa tag P100 nga binuwan nga kontribusyon sa trabahante nga tugbangan usab sa P100 nga kontribusyon sa amo, ugod Pebrero, P200 na ang kontribusyon sa mga membro ug P200 usab ang itugbang sa mga amo, papas sa opisyal sa HDMF Bohol.

Kini usab ilang nahukman human usab gikonsiderar ang pagkalang-kalang sa mga benepisyo nga makuha subay sa Section 7 sa Republic Act No. 9679.

Ang RA 9679 o ang Home Development Mutual Fund Law of 2009, nahimo na nga pugos ang pagpasakop sa Pag-IBIG Fund sa tanan nga trabahante nga gisakop sa Social Security System sa pribadong sector ug sa Government Service Insurance System sa pangpublikong sector.

Dungan sa pagtaas sa kontribusyon, ang mga sakop sa Pag-IBIG Fund makapaabut usab sa gipilo sa doble nga tigum, mas taas nga kakuhaan sa kwarta nga iyang ahuwaman ug mas molungtad nga pundo sa PAG-IBIG aron makatabang sa pagtubag sa panginahanglan nga makatukod og 1.5 milyones ka desente nga pabalay sa mga Pilipino matag tuig sulod sa 6 ka tuig, pasabut ni Cirujales.

Ang Pag-IBIG Fund natahasan sa pagtabang sa pagtubag sa panginahanglan sa pabalay sa mga Pilipino nga kabus ug sa pagtabang aron ang mga nanarbaho, makahigayon sa pagtigum sa ilang kinitaan diha nga askil pa, aron may magamit sa higayon nga mapa-undang na sa trabaho dala sa edad ug kakayahan sa lawas.

Sa nagkadaku nga panginahanglan nga pundohan ang kapasidad sa goberno nga makapatukod og mga balay alang sa mga kabus ug mga sakop sa Pag-IBIG, ang pagpatuman sa bag-o nga pagpaundo sa matigum unya pohon, maghatag sa Pag-IBIG sa kapasidad sa mas daghan pang benepisyo sa mga sakop, mas ubos nga interes sa mga pahuwam sa membro ug mas ubos nga balayranan sa mga niadtong mikuha og pabalay, patin-aw ni Cirujales. 

Ang matigum usab, samtang dili pa kuhaon sa mga membro nga wala pa makaretiro, maggahum usab sa Pag-IBIG Fund sa pagtubag sa tumong sa Presidente nga may mapili nga desente nga kapuy-an ang mga trabahante nga Pinoy aron makahimo sa ilang mas produktibong abilidad sa pagpangitag hamugaway nga kinabuhi.

Gipasalig usab sa opisyal sa Pag-IBIG Fund nga walay kwarta nga gikugihan og hulog sa empleyado ang mahibilin sa Pag-IBIG, ang tanang natigum sa binuwan nga hulogan, mga dividends sa mga kwarta nga gihuwaman, ug mga tubo, mauli sa empleyado human moabut ang pagkahingkod na sa pundo.

Kini mobalik sa dagway sa retirement benefits, o mas sayo nga pagkuha sa pundo nga nakaabut na sa iyang saktong kinabuhi samtang gihuptan sa Pag-IBIG Fund. (RAHC/PIA7 Bohol)