LUNGSOD NG CALAPAN, Oriental Mindoro (PIA) -- Ipinahayag ni Philippine Statistics Authority (PSA) Oriental Mindoro officer-in-charge at supervising statistical specialist Donna Marie D. Mobe na nasa 715,594 na indibidwal na sa Oriental Mindoro ang rehistrado sa Philippine Identification System (PhilSys).

“Mula Hunyo 21, 2021 hanggang Pebrero 10, 2024, nasa 715,594 na mga indibidwal na may edad limang taon pataas ang matagumpay na nairehistro sa lalawigan ng Oriental Mindoro,” ani Mobe.

Ayon kay Mobe, ang nasabing bilang ay 88 porsiyento ng 813,589 na kabuuang populasyon na limang taong gulang pataas.

Base sa huling datos ng PhilPost, nasa 353,291 na ang bilang ng mga rehistradong indibidwal ang nakatanggap na ng kanilang Philippine Identification (PhilID) na naitala noong Disyembre 31, 2023 o 49 na porsiyento ng kabuuang bilang na nairehistro sa isinagawang Step 2 registration.

Malaking tulong din ang may ePhilID lalo na sa mga transaksiyon sa mga tanggapan ng PSA-CRS sapagkat maaaring humiling ang isang may hawak nito ng mga dokumento kahit wala ng appointment.

Sinimulan ng PSA ang pagsasagawa ng pagpapatala noong Setyembre 13, 2023 hanggang sa kasalukuyan at patuloy na hinihikayat ang bawat Pilipino na magparehistro sa PhilSys para sa mabilis na transaksiyon at maisakatuparan ang mga programa ng pamahalaan at para magkaroon ng pagkakakilanlan ang bawat isa. (DN/PIA Mimaropa - Oriental Mindoro)

Larawan sa pinakataas mula sa PSA Oriental Mindoro