No. of :

No. of Shares:

Currently viewed by: Marcus Rosit

  1. Home
  2. News
  3. 16 ka anay rebelde nakabaton sang bulig pinansyal sang gobyerno

16 ka anay rebelde nakabaton sang bulig pinansyal sang gobyerno

Write a comment

Delete

SYUDAD SANG ROXAS, Capiz (PIA) -- Nakabaton sang bulig pinansyal ang 16 ka anay mga rebelde halin sa gobyerno pinaagi sa Enhanced Comprehensive Local Integration Program (E-CLIP) nga kabahin sang Executive Order No. 70, series of 2018.

Lima sa mga nasambit nga former rebels (FRs) ang nangin kabahin sang New People’s Army kag 11 naman ang nangin miyembro sang Militia ng Bayan ukon mga supporters sang mga rebelde nga New People's Army.

EditDelete
Bukas-palad nga ginbaton sang Capiz provincial government ang anay mga rebelde kag ginpanghatag ang ila tagsa ka bulig pinansyal halin sa gobyerno. Kaupod sa paghatag sanday PSWDO E-CLIP focal person Joerine Tan, Phil. Army 12IB commanding officer Lt. Col. Vicel Jan Garsuta, DILG provincial director Cherryl P. Tacda, kag Capiz Gov. Fredenil Castro (left to right). (Photo courtesy of Capiz Provincial Government Communications Group Facebook page)
Delete

Nahibaluan nga ang tagsa sa mga nagsungka nga mga regular nga miyembro sang NPA ang nakabaton sang P65,000.00, samtang ang mga supporters ang nakabaton sang P15,000.00 kada isa bilang suporta sang gobyerno sa pagbalik nila sa sosyodad. 

Suno kay Joerine Tan nga E-CLIP focal person sang Provincial Social Welfare Development (PSWD), halos tanan nga mga benepisyaro ang nagpahayag nga pagagamiton nila ang ila mga financial assistance para sa ila palangabuhian.

“Ang iban sa ila ibakal nila sang motor kay usually ga-istar sila sa upland barangays. Ibakal nila sang motor kag gamiton man nila ang motor sa pagbiyahe ukon "habal-habal" para mangin source of income nila. Ang iban naman i-invest nila sa poultry farming kag sa abaca farming,” dugang ni Tan. 

Delete

Ginpahayag man ni Tan nga may ara isa ka benepisyaro nga masobra 30 ka tuig nga nangin rebelde. 

“Suno kay Alias Boy ang iya nga mga ginikanan miyembro man sang underground movement, rason kon ngaa sang bata palang siya abi niya daw normal kag ayos lang nga mag-upod siya sa grupo,” suno kay Tan.  

Delete

Ginpahayag man sang E-CLIP focal person nga kalabanan sa mga FRs ang nahaylo sang miyembro sang rebelde kay halos sa ila naga-istar sa binukid nga bahin sang probinsya. 

“Sa ila pang adlaw-adlaw nga pangabuhi abi nila okay lang nga magsunod-sunod sila sa mga amo na nga grupo. Ang awareness nila sa government hindi pareho sa mga ga-istar sa patag,” siling ni Tan.

Ang mga anay rebelde ang nagikan sa mga banwa sang Tapaz, Jamindan, kag Cuartero. 

Kaangot diri, ginpahayag pagid niya nga may mag-asawa man nga nagdesisyon na nga magbalik sa luyo sang gobyerno bangud gusto nila hatagan sang maayo nga kinabuhi ang ila mga kabataan.  

EditDelete
Si Phil. Army 12IB commanding officer Lt. Col. Vicel Jan Garsuta kaupod ang mga rebel returnees sa Governor's Hall sa sulod sang Capiz Provincial Capitol. (Photo courtesy of Capiz Provincial Government Communications Group Facebook page)
Delete

“Narealisar nila nga gakatigulang na sila kag daw hindi na nila kaya ang pangabudlay sa bukid kag gusto man nila nga ma-eksperyensyahan sang ila mga kabataan ang normal nga pangabuhi,” dugang pa sini. 

Sa pihak nga bahin, ginpasiguro man ni Gov. Fredenil Castro nga ang gobyerno probinsyal sang Capiz bukas palad nga ginabaton ang mga anay rebelde nga nagbag-o ang paminsaron kag nagbalik sa sabak sang gobyerno. 

“Ari diri ang inyo gobyerno nga nagabatyag para sa inyo, gani ululupod kita,” ang mensahe sang gobernador sa mga anay rebelde kag mga aktibo pa nga rebelde agud magsungka man kag magpangabuhi sing matawhay kag bilang produktibo nga mga indibidwal. (AGP/PLF/PIA Capiz)

About the Author

Pia Lorraine Francisco

Information Officer

Region 6

Related News

Feedback / Comment

Get in touch