TAGBILARAN CITY, Bohol, Feb. 5 (PIA) -- Agi og pag-abag sa paghulagway sa mga katawhan sa kabuhong sa Bohol sa iyang kultura, kalikopan ug kapanulundan, gitanyag sa Bohol Arts and Cultural Heritage (BACH) Council Museums and Galleries Commitee ang mga museum boxes, kini matud pa sa usa ka local nga opisyal sa National Museum of the Philippines (NMP) dinhi.

Si Rachelle Lacea, kinsa maoy giisip nga daku-dako sa NMP Bohol, mibutyag nga sa dili madugay, itanyag na ngadto sa mga taga Bohol ang labing menos unom ka mga museum boxes agi og abag sa mga tawo nga buot makasabut sa kinatibuk-ang hulagway sa mga natumbok nga mga natural ug gisunod nga mga katigayunan sa Bohol.

Ang Museum Box, usa ka proyekto sa BACH Council ug gipundohan sa kagamhanang probinsyal, agi og pagtabang usab sa pagpasabut sa katawhan kabahin sa mga kapanulundan ug kabtangan gawas pa sa natural nga kinaiyahan sa Bohol.

Una na nga gibuksan ngadto sa mga katawhan sa Barangay Badiang Anda niadtong Enero 27 niining tuiga, ang Lamanoc point Museum Box, usa sa unom nga gilaraw sa NMP nga himoog available ngadto sa mga komunidad sa Bohol.

Gibuksan atul sa pagpadayag sa Lamanok Heritage Management Initiative (LaHMI) pinaagi sa public viewing ug community validation sa labing una nga Documentary Film sa dili makihap nga kulturanhng kapanulundan sa Lamanok Point.

Ang Lamanok Point museum box nagpakita sa katingalahang Lamanok Point, usa ka mahinungdanon nga geosite sa Bohol.

Ang Museum Box, usa sa mga pamaagi sa mga museyo nga dalhon ang museyo ngadto sa mga komunidad nga wala pa makasinati sa unsay anaa didto sa sulod sa museyo.

Gihimo subay sa pino nga buhat sa  mga artists aron masundog nga duol sa tinuod ang Lamanok Point, kini nagpadayag sa kamaayo sa mga Bol-anong artists ilabi na nila Jackie Curambao ug Eric Catot, mga sakop usab sa BACH Council.

Pinaagi sa Museum Box, mamahimong mas sayun sa mga taga museyo ang pagpasabut sa mga katawhan sa kaanindot ug kamahinungdanon sa usa ka butang, lugar, talan-awon ug kapanulundan nga ilang masinati sa museum box isipo gabay sa pagkat-on.

Matud sa NMP nga pinaagi sa museum boxes, mapahinumdom usab sa mga komunidad nga nanimuyo diin ang geosite, kapanulundan ug natural nga bansay makit-an, aron usab sila ang manguna sa pagpanalipod niini, paambit ni Lacea.

Kahinumduman nga ang Bohol naapil na sa listahan sa United Nations Educational Scientific ug Cultural Organization’s geoparks, ang labing dako nga geopark sa Asya.

Kini dala sa mga talagsaon nga mga talan-awon, mga kulturanhong timailhanan, mga gitukod nga mga kapanulundan ug mga talagsaong buhilaman, butang nga dili igkita sa ubang lugar ug mao nag angay nga mapanalipdan ug mapatunhay hangtud sa kahangturan.

Gawas sa Lamanoc Point, himoan usab og museum box ang Asin Tibuok sa Alburquerque, Sandugo Site sa Loay, ug uban pang mga kulturanhong timailhanan sa Bohol. (RAHC/PIA7 Bohol)