TAGBILARAN CITY, Bohol, Feb. 22 (PIA) -- Kinahanglan nga ang tanan nga service charges nga gikolekta ug milama sa mga resibo nga i-isyu sa kasagarang mga hotels, restaurants ug susamang establisemento, adto lamang ug bahinon sa tanan nga empleyado nga anaa sa service operations.

Kini maoy pahinumdom sa Department of Labor and Employment (DOLE) nga naghimo sa Technical Advisory Visit Orientation (TAV) didto sa Saulog Gymnasium sa City Hall alang sa mga gagmay nga mamumuhunan o micro, small ug medium enterprises (MSME) sa Cogon District.

Sa TAV orientation, gipasabut sa DOLE pinaagi nila ni chief labor and employment officer Ma. Eloida Cantona ang kamahinungdanon sa pagsubay sa  mga lagda sa pagpadagan sa negosyo ilabi na subay sa Labor Code of the Philippines, aron mahatagan sa mga permits ug licenses nga magsumpay sa tabang ug suporta sa kagamhanan ngadto  sa mga gagmay nga negosyante.

Didto sa TAV, gipasabut usab ni Labor Inspection Officer Hadassah Liezl Cadua nga sa mga establisemento nga nangolekta og service charges, ang bahinan sa kinatibuk-ang makolekta, kadto lamang naapil sa service crew nga magtunol sa serbisyo ug dili malakip niini ang mga managerial positions, security operations ug kadtong anaa sa back office operations.

Kini nga lagda, gikuha ni Cadua sa Department Order 242-2024 ug gipatuman sugod Pebrero 18, 2024.

Sa nasampit nga gabay, gilatid didto nga ang mga malakip sa bahinay segun sa katas-on usab sa oras nga giserbisyohan, kinahanglan angay, ug pananglit sa negosyo nga coffee shop, ang barista ug  ang mga waiters and apil sa bahin.

“Walay apil sa bahinan ang anaa sa back office workers, ug security guards,” patin-aw sa DOLE. (RAHC/PIA7 Bohol)