SYUDAD SANG ILOILO -- Ginsuguran na ang paghanda sang National Museum of the Philippines kag Iloilo City Government sa excavation kag pre-restoration works sang Fort San Pedro Iloilo nga ginakabig nga importante nga cultural property.

Sa ginhiwat nga sinapol, ginkilala ni NMP Director-General Jeremy Barns kag Mayor Jerry P. Treñas ang mga kinahanglanon agud masugdan ang preliminary works tuhoy sa P4 ka milyon nga proyekto.

Ginbisita ni Attorney Ma. Cecilia U. Tirol, NMP Visayas director, kaupod sang mga arkitekto sang Iloilo City government ang propedad sining bulan lamang.

Gintun-an man ni NMP Archaeology Division head Dr. Mary Jane Louise A. Bolunia ang 1820 nga blueprint sang fort, kag ginkumpara sa mga laragway nga nakuha sang 1930s tubtub 1940s kag matapos ang World War II.

Nagahugis ang Spanish-built fortress sang quadrilateral kag may takos nga  60 meters tubtub 60 meters sa building footprint.

Ang dingding nahimo sa cut coral stones nga gin-quarry pa sa Guimaras kag may kataason nga 12 ft kag kadamulon nga 30 ft.

Suno sa maragtason nga kasaysayan, ang mga foretresses kaanagay sang Fort San Pedro ang gintuga sang mga espanyol agud maamligan ang mga kabanwahanan batok sa mga Moro nga mga pirata.

Sang ika-20 nga siglo, ang istraktura nag-amat amat na nga nagausmod kag naguba sang World War II.

Sa karon, nagaserbe ang ini nga duog bilang parke kag may mga istraktura nga mga estatwa kag gazebo. (AAL/LMLE/PIA Iloilo/NM-Iloilo)