Samtang, ang isa naman ka resolusyon ang may kaangtanan sa pagpanawagan sa Land Transportation Office (LTO) sa pagdugang sang mga katapo sang deputized personnel nga magapangdakop sa mga nagalapas sa trapiko.
Suno sa impormasyon sang GPPO, kapin sa 279 ka mga aksidente sa trapiko ang na-rekord sa probinsya halin Enero tubtub Disyembre 2023.
Naglab-ot sa 102 ka mga traffic accidents ang na-rekord sa banwa sang Jordan, 63 sa Buenavista, 46 sa Nueva Valencia, 31 sa San Lorenzo, kag 37 naman sa banwa sang Sibunag.
Ang ini nga mga aksidente nagresulta naman sa 489 ka mga biktima kun sa diin 137 sini ang nagapangidaron sang 18-30 anyos kag 124 naman sini ang yara sa 31-40 anyos.
Masami man sa mga nadalahig sa aksidente amo ang mga drayber sa motorsiklo kag human error naman ang isa sa dako nga kabangdanan sang traffic accidents sa probinsya.
Para naman kay Police Lt.Col. Efren Lozada, Deputy Director for Administration sang GPPO, ang nasambit nga mga datos ang makagiya sa mga lokal nga opisyal sa pagdihon sang polosiya nga makasabat sa pagtaas sang kaso sang aksidente sa trapiko.
Suno man sa lokal nga otoridad, ginakinahanglan man nga pabaskugon ang information dissemination campaign sa mga pumuluyo tuhoy sa layi sa trapiko. (AAL/LMLE/PIA Iloilo/Guimaras PIO)
