CEBU CITY, Cebu (PIA) – Mokabat sa 139 ka mga ginikanan sa mga profiled child laborers sa Barangay Tisa, Cebu City nakadawat sa ilang livelihood assistance gikan sa Department of Labor and Employment 7 (DOLE-7) nga adunay kinatibu-ang kantidad nga Php 3.5 Million.

Ang pag-release ug pag-apod-apod sa mga materyales, jigs, ug mga ekipo nga gikinahanglan alang sa tagsa-tagsa ka mga proyekto sa panginabuhian sa mga nakadawat nahitabo sa barangay gym sa Barangay Tisa nga gipasiugdahan sa DOLE Tri-City Field Office (TCFO).

Ang LGU-Tisa isip accredited nga kauban sa DOLE-7, maoy nangulo sa canvassing ug procurement sa mga butang ug dako usab ang papel sa pagmonitor sa matag livelihood undertaking.

Ang maong mga benepisyaryo mopahigayon na sa ilang kaugalingong pagpili sa livelihood project diin ang matag package nagkantidad ug P26,000 ngadto sa P29,000. 

Pipila sa mga mamahimu nilang panginabuhian mao ang: Rice Retailing, Pungko-pungko, Cake and Pastries, RTW and Frozen Products, Fruits Selling, Siomai Selling, Ngohiong Selling, BBQ Selling, Meat and Spices Selling, Rice and Egg Vending, Motor Parts, Street Food Selling, Silogan, Fish and Meat Selling, Seafood Selling, Water and Puto Cheese Selling, Buy and Sell (Ukay-ukay). 

“This initiative is in line with the DOLE’s advocacy of addressing the incidence of child labor in the country and in the region in particular. By providing the parents and/or guardians of these children with livelihood assistance, we are assured that the rights of every child are protected and that they will no longer engage in child labor activities that will hamper them from enjoying their rights as a child such as going to school," sumala ni DOLE-7 regional director Lilia A. Estillore.

(Kini nga inisyatiba subay sa adbokasiya sa DOLE sa pagsulbad sa insidente sa child labor sa nasud ug ilabi na dinhi sa atong rehiyon. Pinaagi sa paghatag sa mga ginikanan o guardian niini nga mga bata og hinabang nga panginabuhian, kita gipasaligan nga ang mga katungod sa matag bata gipanalipdan ug nga sila dili na moapil sa mga kalihokan sa child labor nga makababag kanila sa pagtagamtam sa ilang mga katungod isip usa ka bata sama sa pag-adto sa eskwelahan.) 

Ubos sa livelihood program sa DOLE, ang mga ginikanan ug guardians sa mga child laborers ang kwalipikado nga maka-avail sa “Kabuhayan Para sa Magulang ng Batang Manggagawa” o KASAMA.

“Through this program, we are hopeful that we can help provide and promote sustainable livelihood as a tool to combat child labor,"  dugang ni Estillore.

(Pinaagi niini nga programa, kita malaumon nga kita makatabang sa paghatag ug pagpalambo sa malungtarong panginabuhian isip himan sa pagsumpo sa child labor.) 

Ang programa nagsugod na sukad niadtong 2008 ug gihatagan ug alokasyon gikan sa kinatibuk-ang DOLE Integrated Livelihood Program and Emergency Employment Program (DILEEP) budget.

Ang DOLE-7 nagpadayon karon sa ilang monitoring sa tanang mga child laborers nga giprofile sa miaging tuig sa tumong nga masusi ang labing tukma nga interbensyon nga ihatag kanila.

Kabahin usab sa tabang nga gihatag sa DOLE ngadto sa mga benepisyaryo mao ang ilang usa ka tuig nga coverage sa Group Personal Accident Insurance pinaagi sa GSIS. (RGC/PIA7 Cebu with reports from DOLE-7)