TAGBILARAN CITY, Bohol (PIA) -- Gihingosgan sa Securities and Exchange Commission (SEC) ang mga inisyatiba niini aron ipasiugda ang paggamit sa capital markets isip usa ka dali nga gigikanan sa pondo alang sa gagmay nga mga negosyo pinaagi sa pagpahigayon sa usa ka roadshow.

Gipahigayon sa SEC ang ilang roadshow kabahin sa capital formation alang sa mga micro, small and medium enterprises (MSMEs) ug startups niadtong Marso 7, 2024 sa syudad sa Tagbilaran.

Subay sa tumong sa nasudnong kagamhanan ngadto sa pinansyal nga paglakip, kini nga serye sa mga roadshow nagpasiugda ug nagpataas sa kahibalo sa alternatibong mga opsyon sa financing nga anaa alang sa mga MSME ug mga startup pinaagi sa capital market.

Isip resulta sa serye sa mga roadshow bahin sa capital formation alang sa mga MSMEs ug start-ups nga nagsugod niadtong 2023, ang SEC nakahimo sa pagdasig sa MSMEs sa pag-apil sa crowdfunding, nga nakamugna og minilyon nga kapital alang sa gatusan ka gagmay nga negosyo.

Ang crowdfunding usa ka paagi sa pagkolekta og pondo diin ang kwarta gikuha gikan sa daghang mamumuhonan—kasagaran pinaagi sa online nga plataporma.

Gitugotan niini ang mga tigpamuhonan nga maka-akses sa mga oportunidad sa pamuhonan ug makapahimo sa mga start-up ug MSME nga maka-akses sa bag-ong mga gigikanan sa pondo alang sa ilang mga negosyo.

Matud pa sa SEC nga niadtong 2023, 146 ka mga kompanya ang nagpataas sa kapital nga mokabat sa P427 milyones alang sa 1,114 ka proyekto pinaagi sa crowdfunding initiative.

Sa kinatibuk-an, 37 ka mga kompanya ang mga partisipante sa bag-o lang natapos nga roadshow sa SEC.

Samtang, 314 pa ka mga kompanya ang mipadayag og interes sa pagpataas sa kapital pinaagi sa crowdfunding, human sa pagsalmot sa roadshow nga gipangunahan sa SEC Office for the Advancement of Strategic Investments in SMEs (OASIS) sa Baguio, Tarlac, Manila, Legazpi, Cebu, Iloilo, Bacolod, Tacloban, Davao, Cagayan de Oro ug Zamboanga.

Ang roadshow nagsugod sa Davao sa unang quarter niadtong 2023. (ECB/PIA7-Bohol)