SYUDAD SANG ROXAS, Capiz (PIA) -- Ginbuksan sang Capiz State University (CapSU) ang “Mangrove Crab Hatchery kag Nursery Facility" sa Barangay Agojo, banwa sang Panay agud nga makabulig para sa kinahanglanon nga semilya sang alimango sa probinsya kag kaiping nga mga lugar sa rehiyon.

Ang nasambit nga proyekto ang ginapatuman sang CapSU pinaagi sa  pondo sang Department of Science and Technology (DOST) -Philippine Council for Agriculture, Aquatic and Natural Resources Research and Development (PCAARRD).

Ginpahayag ni Juafe Abareles nga hepe sang DOST – Capiz nga ang hatchery kag nursery para sa alimango ang natigayon bangud sang pagbinuligan sang mga natungdan nga ahensya para sa isa ka handum nga mapasanyog ang industriya sang aquaculture sa probinsya.

Ginatumod ni Abareles amo ang DOST-PCAARRD, CapSU, Southeast Asian Fisheries Development Center (SEAFDEC) kag lokal nga pangulohan sang Panay.

Samtang ang hatchery ang ginalauman nga makahatag solusyon sa pagkinahanglan sang mga naga “culture” sang alimango nga sa “wild caught” nga mga semilya nagakuha sang ila “seedstocks” para buhi-an sa punong ukon sangha.

Nahibaluan nga magluwas sa “wild-caught” nga semilya, ang iban nga mga nagapanag-iya sang punong ang nagakuha sang ila semilya sa SEAFDEC sa Iloilo.

Lubos naman ang pagpasalamat ni Mayor Vicente Bermejo sang Panay para sa gintukod nga teknolohiya sa ila banwa. (AGP/AAL/PIA Capiz)