SAN JOSE, Antique (PIA) -- Ginsiguro kang Philippine Health Insurance Corporation (PhilHealth) sa publiko nga ang pag-adjust kang premium contribution ginhimo para mas mapanami andang mga programa, serbisyo, kag benefit package.

Ginhambal ni information officer Liza Joyce Songcayawon kang Local Health Insurance Office (LHIO) Antique nga ang PhilHealth, paagi sa premium rate adjustments, padayon nga gina-improbar ang andang mga programa kag serbisyo para sa mga Pilipino.

Bisan wara pag-adjust kang premium rate kang 2023, ginpatigayon kang PhilHealth ang pira ka mga programa nga ginalakipan kang pagpataas kang hemodialysis sa 156 sessions, outpatient mental health package, kag ang pagpasanyog kang Z Benefit Package para sa orthopedic implants kag colorectal cancer.

Dugang pa, nahimo man pataasan kang PhilHealth ang benefit package para sa ischemic (halin P28,000 asta sa P76,000) kag hemorrhagic stroke (halin P38,000 asta P80,000), pati man ang benefit package para sa pneumonia high-risk (halin P32,000 asta P90,100).