LUNGSOD NG CALAPAN, Oriental Mindoro (PIA) -- Ayon sa Philippine Statistics Authority (PSA) Oriental Mindoro sa isinagawang press conference noong Lunes, Marso 12, na umabot na sa 723,220 ang bilang ng mga indibidwal na rehistrado na sa Philippine Identification System (PhilSys).

Ayon kay officer-in-charge supervising statistical specialist Donna Marie D. Mobe na may katumbas ang nasabing bilang ng mga rehistradong Mindoreño sa 79.62 percent.

Aniya, mula Pebrero 13 hanggang Marso 9 ngayong taon ay umabot na sa 2,084 ang mga nagparehistro sa PhilSys ID na may edad limang taon pababa habang ang mga naisyuhan ng ePhilIDs ay nasa 639,554 at ang mga nakatanggap na ng PhilSys ID card ay nasa 353,291.

Ayon pa kay Mobe, maaari nang iparehistro sa tanggapan ng PSA o sa mga satellite registration ang mga bata na may edad isa hanggang apat na taon. Kailangan aniya sa pagpaparehistro ng mga batang ito ay kasama ang magulang o kahit isa man sa ama o ina na rehistrado na rin sa PhilSys. Ilan sa mga requirements na kailangang ipakita ng mga magulang ang katibayan ng kapanganakan o birth certificate.

Samantala, umabot naman sa 47,187 na mga guro at estudyante mula sa mga pribado at pampublikong paaralan sa Oriental Mindoro ang kumpleto na sa step 2 habang 2,316 naman ang nabigyan na rin ng ePhilIDs.

Patuloy pa rin ang kanilang isinasagawang PhilSys registration on wheels pati ang patuloy na pagpaparehistro sa mga PhilSys Co-location at Civil Registry Service (CRS) outlet na matatagpuan sa lungsod ng Calapan at sa ibang bayan ng lalawigan. (DN/PIA Mimaropa - Oriental Mindoro)