CEBU CITY, Cebu City (PIA) -- Aduna nay bag-ong birthing center nga mapahimuslan sa mga inahan sa Danao City, kini human ang lungsod miabli sa ilang labing bag-ong Danao City Health Services Office Birthing Center.

Ang bag-ong gi-inagurahan nga birthing center, nga makatagana sa tulo ka mga pasyente nga dungan sulod sa 24 oras, makadugang sa healthcare infrastructure sa dakbayan, nga nagtanyag ug dugang mga pasilidad alang sa mga inahan sa Danao City.

Pipila sa mga health services nga gitanyag sa maong pasilidad mao ang, Normal Delivery Management, Postpartum and Newborn Care, lakip na ang Crede's Prophylaxis, cord dressing, immunizations ug newborn screening.

Samtang aduna usab kini gitanyag nga Family Planning Services ug STI and HIV Screening.

Ubos sa liderato ni Danao City Mayor Thomas Mark Durano, gipahingusgan sa Danao City government ang pagtan-aw sa maternal healthcare, labi na sa mga mabdos nga inahan.

Pagsunod sa mandato sa Department of Health, hinungdanon kini alang sa mga mabdos nga mga babaye nga manganak sa mga lisensyado nga pasilidad sa pagpanganak o mga ospital nga adunay gibansay nga mga kawani alang sa mas luwas nga pagpanganak.

Ang Danao City Health Services Office Birthing Center mohatag og serbisyo sa tanang lumulupyo sa Danao City, gawas niadtong adunay mga kondisyong medikal nga mahimong magkinahanglan og referral sa mas taas nga lebel sa pag-atiman.

Gipunduhan pinaagi sa Health Facility Enhancement Program (HFEP) sa Department of Health Central Visayas, ang pasilidad ug ang state-of-the-art nga kahimanan niini adunay kinatibuk-ang kantidad nga nikabat og P7 million.

Ang hugot nga kolaborasyon tali sa DOH, City Engineering Office, ug dugang nga pundo gikan sa City Government sa Danao maoy nagpahigayon sa malampuson nga katumanan niining importante nga healthcare initiative.

Sa pag-abli sa bag-ong Birthing Center, ang Danao City aduna na karoy 18 ka mga local-government-operated Birthing Centers. (RGC/PIA7 Cebu with reports from Danao City PIO)