TAGBILARAN CITY, Bohol (PIA) -- Ang mga pasyente nga na-admit sa napulo (10) ka mga district hospital nga gipanag-iya sa kagamhanang probinsiyal nga kinahanglang ibalhin sa ubang mga pasilidad sa medikal alang sa dugang nga interbensyon sa medisina mahimo nang makapahimos sa paggamit sa ambulansya sa mga tambalanan nga libre.
Kini human mapasar ang Provincial Ordinance No. 2023-020, nga gimugna ni Board Member Aldner Damalerio sa unang distrito ug gilagdaan ni Gob. Erico Aristotle Aumentado niadtong Enero 4.
Ang napulo ka mga district hospital mao ang Natalio Castillo Memorial Hospital sa Loon, Maribojoc Community Hospital, Catigbian District Hospital, Clarin Community Hospital, Fransciso Dagohoy Municipal Hospital sa Inabanga, Garcia Memorial Provincial Hospital sa Talibon, Pres. Carlos P. Garcia Memorial Hospital sa isla sa Pitogo, Candijay Community Hospital, Teodoro Galagar District Hospital sa Jagna, ug Cong. Simeon Toribio Memorial Hospital sa Carmen.
“It used to be nga kung na-admit ka ani nga hospitals, dad-on ka sa Tagbilaran for example, pabayron pa sa pagamit sa maong hospital services pero sugod niadtong Enero 4, ang pagpirma sa atong gobernador, libre na ang pagamit sa atong hospital ambulances,” matud pa ni Damalerio sa iyang post sa social media niadtong Marso 11.
Ang paggamit sa mga ambulansya nga gipanag-iya sa probinsiya nagkantidad og P1,000 depende sa gilay-on sa sakyanan.
Si Damalerio nagkanayon nga ang proseso sa paghimo sa ordinansa gikan sa mga diskusyon sa mga hepe sa mga ospital, mga konsultasyon sa lebel sa barangay, mga deliberasyon sa mga kauban sa Sangguniang Panlalawigan (SP), mga meeting sa komite, ug mga pagdungog sa plenary session.
Ang ordinansa wala lamang naglatid sa mga giya sa libre nga paggamit sa mga ambulansya sa district hospital apan naglista usab sa mga gidili nga buhat.
Lakip na niini ang pagkolekta sa mga bayronon, pagdumili sa paghatag sa serbisyo, kalingawan o pribado nga paggamit sa sakyanan, ug pagdala sa mga patay’ng lawas nga wala’y labot sa mga programa sa medikal nga outreach ug uban pang operasyon sa ospital o katalagman.
Ang kagamhanang probinsyal, ubos sa estratehikong agenda sa pagdumala ni Aumentado, mipasalig sa paghimog lig-on nga mga komunidad pinaagi sa pagmugna sa inklusibo nga serbisyo sa panglawas ug katilingbanon. (ECB/PIA7 Bohol)
