TAGBILARAN CITY, Bohol (PIA) -- Ang lungsod sa Antequera magsaulog sa ilang ika-148 nga Foundation Day pinaagi sa serye sa mga kalihokan ubos sa temang “Pagbuntog sa mga Hagit, Pagtukod sa Kalig-on ug Pagpatunhay sa Kalamboan” (Facing the Challenges, Building Strength and Sustaining Development).
Ang upat ka adlaw nga selebrasyon, nga gitawag og ‘Piskaya Festival’, magpakita sa malambuong kultura, kasaysayan, ug industriya sa basket weaving sa lungsod.
Ang Piskaya usa ka Bisaya nga pulong nga nagpasabut nga abunda o daghan.
Ang kasaulogan sa kapistahan magsugod sa Marso 14 pinaagi sa pagbendisyon ug pag-abli sa basket ug agricultural display booths ug sundan sa opening program ug sa fire olympics nga ipahigayon sa Bureau of Fire Protection (BFP) Antequera.
Sa ikaduhang adlaw, pasidunggan sa lungsod ang mga kababayen-an sa Antequera pinaagi sa usa ka Women’s Day Celebration, diin magpasundayag og nagkalain-laing aktibidad sama sa livelihood seminars, health services, ug mga dula.
Pagka-gabii mapuno sa musika ug talento samtang ang Kanta Piskaya (Singing Contest) magpakita sa labing maayong mga mag-aawit sa lungsod.
Sa ikatulong adlaw sa selebrasyon, ipahinungod sa sports ug adventure, tungod kay ang Tour De Antequera 2024 (21KM, 10KM ug 5KM Trail Run) mohagit sa mga partisipante sa pagdagan agi sa mga talan-awon nga agianan sa lungsod.
Inig-gabii ipahigayon ang “Rakrakan sa Plaza” nga pasiugdahan sa Antequera Local Bands, nga molingaw sa katawhan sa ilang orihinal ug cover nga mga kanta.
Ang highlight sa selebrasyon sa Marso 17, mao ang ang aktwal nga Foundation Day sa Antequera.
Magsugod ang adlaw pinaagi sa usa ka misa ug paghalad sa bulak, sundan sa usa ka hamubo nga programa diin ang mayor mohatag sa State of the Municipality Address ug ilhon ang mga board passers ug ang mga tawo nga maayo sa sports.
Ang programa sundan sa paniudto ug pakig-uban sa mga bisita ug mga residente sa lungsod.
Pagka-hapon gipaabot nga mapuno sa kolor ug kahinam sa ipahigayong street dancing ug ang festival ritual showdown.
Ang mga partisipante, nga nagsul-ob og mabulukon nga mga costume ug props, mopasundayag og mga sayaw nga naghulagway sa kasaysayan, kultura, ug basket weaving industry sa lungsod.
Ang selebrasyon pagatak-upan sa usa ka live band nga maglingaw sa mga tawo hangtod sa tungang gabii.
Ang Piskaya Festival dili lamang sa paghandum sa anibersaryo sa pagkatukod sa lungsod, apan ipakita usab ang daghang mga kahinguhaan, produkto, ug mga talento niini. (ECB/PIA7 Bohol)
