TAGBILARAN CITY, Bohol (PIA) -- Magpadala ang Department of Health (DOH) ngadto sa Trinidad Rural Health Unit og doctor gikan sa Doctor to the Barrios program, kini maoy saad ni Health Sec. Teodoro Herbosa, sa iyang pagbisita sa lungsod.
Atul sa pagpabalaan sa bulk water treatment facility nga kaya moproseso og bisag lubog nga tubig sa sapa ngadto na sa luwas nga tubig mainum didto sa Hinlayagan Ilaud, gipasalig usab sa kalihim sa Health nga sanglit may kasaligan na nga tubig nga supply alang sa lungsod, makahimo na ang DOH sa pagpadayun sa ilang suporta alang sa public health nga mga panginahanglan sa mga taga Trinidad.
Ang bag-o nga bulk water treatment facility napabarug usab sa lungsod sa Trinidad, pinaagi sa pagkorambusay sa local nga kagamhanan pinangulohan ni Mayor Roberto Cajes ug ang Richli Corporation, usa ka pribado nga kompanya nga tig-ugmad sa tubig mainum.
Ang Trinidad, bisan pa man kon may kaugalingon nga serbisyo sa panubig alang sa mga kabalayan, kuwang pa gihapon sa serbisyo, hinungdan nga bisan ang Rural Health Unit (RHU) sa lungsod, maglisud sa pagpadangat sa serbisyo tungod usab sa suliran sa tubig.
Ang lungsod may 44,000 ka mga tawo, pun-an pa sa kapin sa 8 mil ka estudyante sa tunghaan sa lungsod, ang Trinidad Municipal College, nga manginahanglan usab og tubig.
Tungod sa kalambuan sa panubig sa lungsod, matud pa ni Herbosa nga kaya na nga pahimoan sa kagamhanan og lboratory aang RHU sa lungsod.
Ang laboratory nga tukoron, may hematology, pathology ug uban pang mga testing nga gigamitan sa mga ekipo sa laboratory, pohon.
Kini lakip na ang pagpasalig sa DOH nga himoan og lig-on nga katalian ang RHU Trinidad sa mga regional support facilities ug tertiary hospitals aron makapadala usab og mga espesyalista aron makapadagan na ang lungsod sa ilang RHU isip primary hospital.
Niini nga paagiha, matud ni Herbosa nga mamahimo na usab nga i-explore sa lungsod ang napauso nga teleconsulting aron makapadangat sa mas lapad nga katawhan sa serbisyo nga gikinahanglan.
Usa ka resolusyon ang gitunol ni Bise Mayor Ferdinand De Erio ngadto sa DOH secretary alang sa ilang tumong nga manghangyo og doctor alang sa lungsod.
Matud sa resolusyon, ang Trinidad na ang mopahiluna sa board and lodging, ug kon may mahatag ang DOH, ang lungsod mohatag usab og counterpart sa mga per diem, travel ug communication allowances, ug mga ginagmay nga galastohan, aron pasayonon ang kinabuhi sa maasign nga doctor.
Niini nga higayonan, mipasalig usab si Sec Herbosa nga magpadala ang DOH sa gihangyo nga doctor gikan sa Doctor to the Barrios Program sa kagamhanan. (RAHC/PIA7 Bohol)
