Sandig sa datos sang Regional Epidemiology and Surveillance Unit sang DOH 6, nagsaka sa 18 ka mga kaso sang Pertussis ang nalista sa bug-os nga rehiyon sugod sang Enero tubtob Marso 9 subong nga tuig. Sa 18 ka mga kaso, duha sini ang kumpirmado.

Nahibaluan nga sa datos sang RESU, wala sang nalista nga kaso sang whooping cough sang tinalikdan nga tuig.

Suno sa talatapan, ang Pertussis isa ka makalalaton nga sakit nga masami malubha sa mga lapsag kag mga kabataan kag napabilin nga isa ka “serious public health concern.”

Ini nga sakit makuha pinaagi sa direkta nga contact sa ginapaguwa nga “respiratory mucus membranes”

Bangod sini, ginapanugyan sang DOH 6 sa mga komunidad ang paghimo sang mga tikang agod nga malikawan ang paglapta sang sakit kag maproteksyonan ang mga lapsag nga indi pa mabakunahan. Lakip na diri ang pagpasiguro nga indi sila mapalapit sa mga indibidwal nga naga-eksperyensya sang mga sintomas nga kaangay sa trangkaso.

Ginpangabay man sa mga ginikanan nga tsekyaron ang estado sang pagbakuna sa ila mga kabataan kag magpabilin nga nagasunod sa gintalana nga routine immunization schedule.

Sa isa press release, ginhatagan punto ni Dr. Adriano P. Suba-an, regional director sang DOH 6, ang importansya sang pagpabakuna, timprano nga pagtukib sang mga simtomas, husto nga hygiene, kag cough etiquette kontra sa halit nga dala sang sini nga sakit.

Dugang pa sini nga importante man ang regular nga paghugas sang mga alima, pagsuksok sang facemask, kag pagkadto sa doktor kon makabatyag sang kaangay nga mga sintomas sang Pertussis. (AAL/FRG/PIA6)