SYUDAD SANG ILOILO -- Gin-emphasize sang Bureau of Fire Protection (BFP)-Iloilo ang importansya sang pagtapna sang sunog sa mga local government units kag stakeholders sa kahiwatan sang Joint Provincial Peace and Order Council (PPOC) and Provincial Anti-Drug Abuse Council (PADAC) Meeting.

Ginpakigbahin ni Provincial Fire Marshal FSSupt Bartolome Beliran ang mga fire prevention tips angot sa vulnerability sang komonidad sa peligro nga dulot sang sunog sa panahon sang tig-ilinit.

Base sa impormasyon sang BFP-Iloilo, may yara sang dako nga pagdugang nga 89.62% sang insidente sang sunog sa first quarter sang 2024 kumpara sa first quarter sang 2023. Naglab-ot man sa 347 nga insidente sang sunog ang na-rekord sa first quarter sa ini nga tuig kumpara sa 183 nga sunog nga narekord sang first quarter sang 2023 sa probinsya sang Iloilo.

Ang mga nagapanguna nga kabangdanan sang insidente sang sunog sa first quarter sang ini nga tuig amo ang rubbish fire, smoking, kag ignition of materials gikan sa baga.

“The combination of rising temperature and dry vegetation creates a conducive condition for outbreak of fires,” pahayag ni Beliran.

Samtang, kapin sa P85,603, 327 naman ang ginbulubanta nga balor sang nahalitan tungod sa sunog sa first quarter.

Gindeklarar ang bulan sang Marso nga Fire Prevention Month kag naangot sa tema nga “Sa Pag-iwas sa Sunog, Hindi Ka Nag-iisa.” Ang paghiwat sang ini nga aktibidad may tinutuyo nga kooperasyon kag pagsakdag agud mapasiguro ang fire-safe kag disaster – resilient nga mga komonidad. (AAL/LMLE/PIA Iloilo)