BAGUIO CITY (PIA) -- Hinihikayat ng City Health Services Office (CHSO) ang publiko na magrehistro sa pinakamalapit na primary care facility sa kanilang lugar.
Ito ay para makapakinabang sila sa mas pinalawak na primary care benefit package o ang PhilHealth Konsulta (Konsultasyong Sulit at Tama).
Binigyang-diin ni Rommel de Guzman ng CHSO-Health Promotion Unit na kahit rehistrado sa PhilHealth ay kailangan pa ring magparehistro sa mga district health centers.
“PhilHealth registration and registration to district health centers are different. Register to your chosen primary care facility,” ani de Guzman.
Ang rehistrasyon sa napiling Konsulta facility o provider ay taunan. Ibig sabihin, balido ang rehistrasyon sa loob ng isang taon.
Sa ilalim ng Universal Health Care Law, lahat ng Pilipino ay otomatiko na miyembro ng PhilHealth. Gayunman, kailangan pa rin nilang magrehistro sa National Health Insurance Program, maging ang mga dependents at mga indirect contributors.
“All Filipinos are automatically members of PhilHealth but they still need to register,” paglilinaw ni de Guzman.
Nilinaw naman nito na hindi na kailangang ipakita ang PhilHealth ID kapag kumuha ng serbisyo sa ilalim ng PhilHealth Konsulta ang isang miyembro sa primary care facility kung saan ito nakarehistro.
Layunin ng nasabing programa na matulungan ang bawat isa na makaiwas o maagapan ang paglala ng sakit.
Ang mga serbisyong kasama sa PhilHealth Konsulta Package ay libre. Kabilang na rito ang konsultasyon mula sa doctor ng primary care facility, health risk screening at assessment, at mga piling laboratory at diagnostic tests.
Maaari ring kumuha ng mga piling gamot ayon sa health risks, edad, at pangangailangan ng pasyente. Kabilang na rito ang anti-microbial, fluid and electrolytes, anti-thombotics, anti-hypertensive, anti-histamine, anti-dyslipidemia, anti-asthma, anti-diabetic, at anti-pryretics.
Ang kinauukulang primary care facility naman ay maaaring magbigay ng referral sa mga pasyente depende sa kanilang pangangailangan sa kalusugan. (DEG-PIA CAR)
