LUNGSOD NG CALAPAN, Oriental Mindoro (PIA) - Kasabay ng regular na buwanang pagpupulong kamakailan ng Samahan ng mga may Kapansanan ng Barangay Bayanan 2, binigyan ng anti-pneumonia vaccine ang nasa 22 kasapi at opisyales ng samahan, na isinagawa sa Barangay Hall.
Dumalo sa nasabing pagpupulong si Charissa Flores-Sy at City Nurse Christian Alferez para magbigay ng libreng bakuna bilang bahagi ng programang pangkalusugan ng pamahalaang lungsod ng Calapan sa pamamagitan ng Person with Disability Affairs Office (PDAO).
Ayon kay Sy, malaking tulong sa katawan ang bakuna kontra pneumonia lalo na ito’y may bisa ng limang taon upang hindi agad dapuan ng nakababahalang sakit kung kaya sila ay nag-iikot upang maturukan ang mga nagnanais na magkaroon ng proteksiyon sa kalusugan.
