Matandaan nga bahul ang nangin epekto kang COVID-19 sa sektor kang turismo bangud sa pagnaba kang mga turista halin sa marapit 1,400,000 bag-o ang pandemya kang 2019 paadto sa kapin 250,000 lang kang 2021.

Dugang ni Perlas, bahul nga bagay para sa ekonomiya kang probinsya ang liwan nga pagbangon kang sektor kang turismo kag pagdagsa kang mga bisita nga nagabuhat kang ubra kag parangabuhian para sa mga Antiqueño.

Pinakaduro sa mga foreign tourists nga nagbisita sa Antique kang nagligad tuig amo ang South Koreans, nga ginasundan kang Americans, Chinese, Germans, kag Australians.

Sa kabanwahanan sa probinsya, ang San Jose de Buenavista ang naka-record kang pinakataas nga tourist influx ukon ang pagsulod kang mga turista, nga ginasundan kang Pandan, Culasi, Sebaste, Sibalom, kag isla kang Caluya.

Samtang, nagtaas man sa 146 kang 2023 ang numero kang mga accredited nga tourism-related nga establisimyento sa bilog nga probinsya kumpara sa 100 kang 2022 kag 86 lang kang 2021.

Suno kay Perlas, tuyo nanda sa APTCAO, sa idalom kang liderato ni Governor Rhodora Cadiao, nga pasanyugon pa ang sektor kang turismo para mas mapasanyog ang ekonomiya kang probinsya kag mapa-ugwad ang kabuhi kang mga Antiqueño. (AGP/BPS/PIA Antique)