PANGLAO, Bohol (PIA) -- Giila ang mahinungdanong papel sa mga kababayen-an sa sektor sa turismo atol sa gipahigayon nga labing unang Pacific Asia Travel Association (PATA) International Conference on Women in Travel.
Gipasiugdahan sa Department of Tourism (DOT), ang tulo ka adlaw nga komperensya nga gipahigayon niadtong Marso 20-22 sa isla sa Panglao gitambungan sa mga lider sa industriya nga nag-atubang sa mahinungdanong papel sa kababayen-an ug sa kasamtangang kahimtang sa gender diversity sa industriya sa turismo.
Giila ni DOT Kalihim Cristina Garcia Frasco ang papel sa mga kababayen-an sa sektor, lakip ang mga nag-unang lider sa kababayen-an sa departamento ug mga trabahante sa turismo nga nag-una sa pagsugod sa bag-ong panahon sa turismo.
“Tourism is not only a tool for economic prosperity but also a force for promoting human dignity (Ang turismo dili lamang usa ka himan alang sa kauswagan sa ekonomiya apan usa usab ka pwersa sa pagpauswag sa dignidad sa tawo),” ingon ni Frasco.
Gipasalamatan niya ang mga mamumuhonan alang sa nagpadayon nga pag-uswag sa sektor sa turismo, nga gipakita sa 100.08 porsyento nga rate sa pagbawi alang sa kita sa internasyonal nga turismo sa nasud nga mikabat sa P482.54 bilyon nga mga resibo sa internasyonal nga bisita niadtong 2023.
Matod pa ni PATA chief executive officer Noor Ahmad Hamid, ang asosasyon naningkamot nga mahimong usa ka catalyst sa responsable nga kalamboan sa turismo sulod sa Asia Pacific Region pinaagi sa inaugural nga women in travel conference.
Kini, matud niya, isip pag-ila sa mga kontribusyon ug mga hagit nga giatubang sa kababayen-an sa industriya.
Sumala sa United Nations World Tourism Organization, niadtong 2022, ang mga empleyadong babaye anaa sa 49.4 porsyento sa mga trabahante sa turismo sa rehiyon sa Asia Pacific, kumpara sa 40.2 porsyento sa mas lapad nga ekonomiya.
Si Gobernador Erico Aristotle Aumentado sa iyang welcome message sa mga organizer, mamumulong ug mga stakeholder sa industriya sa turismo sa maong global nga forum miila sa epekto sa kalihokan sa paghatag og patas nga kahigayonan sa mga babaye sa industriya ug paghatag gahum kanila isip tigdala sa kausaban sa sektor.
Atol sa komperensya gipahigayon ang mga diskusyon kalabot sa lainlaing mga babag sa pagpangulo sa kababayen-an ug pagkaparehas sa gender sa sektor sa turismo, ug ang presentasyon sa Asian Development Bank sa mga inisyatibo nga nagpataas sa kahanas ug kaayohan sa kababayen-an sa mga destinasyon sa Asia Pacific, lakip ang Lao PDR, Vietnam ug Fiji.
Ang mga mamumulong naggikan sa San Travel Services & Business Consultant, Crowne Plaza Manila Galleria, Intrepid Travel, DEAFinite Tour Guiding Services ug Asian Development Bank. (ECB/PIA7-Bohol)
