SYUDAD SANG ILOILO -- Ginlagdaan bilang layi ni Presidente Ferdinand R. Marcos Jr. ang “Philippine Salt Industry Development Act,” nga may tinutuyo sa pagpalig-on kag pagbuhi sang industriya sang asin sa pungsod kabahin sang pagpanikasog sang administrasyon nga mapasanyog ang rural development kag pagtaas sang rural income.

Nakasaad sa 23 nga pahina sang layi nga ginpermahan sang Marso 11 ang pagtanyag sang nagakaigo nga teknolohiya kag panalawsaw, bastante nga pondo, produksyon, marketing kag iban pa nga mga suporta para sa mga mangongoma sang asin agud mapapagsik ang industriya sini, kag maangkon ang mataas nga produksyon, salt-sufficiency kag mangin exporter sang asin.  

“It is further the policy of the State to preserve, protect, and rehabilitate the natural environment in the actualization of its developmental policies,” suno sa layi.

Ang tiglikom sang Department of Trade and Industry (DTI) magaserbe nga vice-chairpeson sang Salt Council, samtang ang mga representante sang mga kooperatiba ang pagapilion sang Bureau of Fisheries and Aquatic Resources (BFAR) gikan sa lima ka mga nominado sa Luzon, kag tatlo sa Visayas kag Mindanao.

Ang kompleto nga kopya sang layi ang na-publish sa Official Gazette kun sa diin ang mga hilikuton sang Salt Council ang ginkilala kaupod man sang pagtuga sang Program Management Office (PMO), Salt as an Aquatic Resource Product, kag iban pa nga importante nga bahin sang layi. (AAL/LMLE/PIA Iloilo/PND)