TAGBILARAN CITY, Bohol (PIA) -- Gi-awhag sa Task Force El Niño ang local government units (LGUs) nga ikonsiderar ang pagsuspenso sa in-person nga klase taliwala sa posibleng epekto sa pagtaas sa temperatura, ilabi na sa mga estudyante.
Sa gipahigayong briefing sa Bagong Pilipinas niadtong Lunes, Abril 1, miingon si Presidential Communications Office (PCO) Assistant Secretary ug Task Force El Niño spokesperson Joey Villarama nga mahimong gamiton sa mga LGU ang ilang awtoridad nga suspensohon ang face-to-face (F2F) nga klase.
“Kung kayo po ay nakaka-experience ng extreme heat sa inyong lokalidad, nasa inyo po ang kapangyarihan para i-shift ang inyong face-to-face classes to online classes,” matud pa ni Villarama.
Gihimug-atan niini nga ang LGUs dili lang angayan nga tagdon ang “convenience” kon dili lakip na ang dili maayong epekto sa pagsaka sa temperatura sa mga tinun-an ug magtutudlo.
Sa balay, ang mga estudyante kinahanglan usab adunay akses sa igo nga limpyo nga tubig nga mainom ug magpabilin sa usa ka lugar nga maayo ang bentilasyon, dugang pa niini.
Sa laing bahin, si Department of Education (DepEd) Assistant Secretary Francis Bringas niingon nga ang mga tinun-an ug magtutudlo adunay opsyon sa pagsul-ob og mas kumportable nga mga sinina sulod sa mga eskwelahan nga ubos sa dress codes.
Una nang gitug-an sa DepEd nga adunay awtoridad usab ang mga school heads sa pagdeklarar og suspensiyon sa klase, gawas sa LGUs.
Niadtong Lunes, gitaho sa DepEd ang 13 ka lugar sa upat ka rehiyon nga gisuspinde ang in-person nga klase gikan sa preschool hangtod sa senior high school, sa publiko ug pribado nga mga tunghaan tungod sa init nga temperatura. (ECB/PIA7-Bohol)
