ILIGAN CITY (PIA) -- Sobra 800 ka mga residente ning dakbayan ang nakabenepisyo sa tuberculosis (TB) and human immunodeficiency virus (HIV) mobile caravan nga gipangulohan sa City Health Office (CHO) kauban ang Department of Health ug Philippine Business for Social Progress.
Gipahigayon ang weeklong mobile caravan sa mga barangay sa Rogongon, Digkilaan, Dalipuga, Suarez, Tambacan, Saray, ug Poblacion.
Naghatag ang caravan og libreng serbisyo sama sa digital chest x-ray, HIV testing, genXpert sputum testing, leprosy skin test, ug libreng konsultasyon ug tambal sa mga residente.
“What is important now, is we must find the patient, treat them para maprevent nato nga mudaghan ang sakit sa tawo,” sumala ni Dr. Ardel Padayhag, National Tuberculosis Control Program Medical Coordinator of the CHO.
Sumala ni Padayhag, importante ang pag-obserbar og cough etiquette, pagsul-ob og facemask, paghugas og kamot isip preventive measures sa TB.
Mahimo sab nga mubisita ang mga residente sa TB Directly Observed Treatment sa CHO o sa ilang health center. Ang mga madiagnose sa TB makadawat sab og libreng tambal.
Mapasalamaton sab ang mga residente sa libreng serbisyo nga gipaduol sa ilang barangay. Usa lamang si Raul Macapil, 76 anyos gikan sa Pala-O. Matod niya importante kaayo nga makapacheck-up sila tungod sa ilang kaedaron.
Nagpasalamat sab si Virgilia Casil, 73 anyos gikan sa Poblacion sa libreng serbisyo para kanila nga mga kabos.
"Dako akayo nakong kaliapy nga dunay libreng sa mga tawo nga walay ikabayad sa pagpacheck up. Nagpasalamat ko sa gobyerno nga gitagaan mi og higayon nga kami mga kabos makabenepisyo mi sa libreng consultation," sumala ni Antonio Rollo Mecarsos.
Para kay Soraya Otos sa Barangay Tambacan importantenga makapacheck up sila bisan pa man wala silay gibati. (LELA/PIA-10/Lanao del Norte)