TAGBILARAN CITY, Bohol (PIA) -- Nagpabiling walay insuhensiya sa  lalawigan sa Bohol.

Kini ang gipahayag ni Brigadier Gen. Joey Escanillas, representante sa Philippine Army 302nd Brigade atol sa hiniusang Provincial Peace and Order Council (PPOC) ug Provincial Anti-Drug Abuse Council (PADAC) meeting sa Kapitolyo Sangguniang Panlalawigan Session Hall niadtong Abril 3.

Ang deklarasyon nagpamatuod sa mga paningkamot nga gihimo sa provincial government ubos sa pagdumala ni Gob. Erico Aristotle Aumentado sa iyang mga inisyatibo sa kalinaw ug kahusay.

Aron mapreserbar ang mga kadaugan isip probinsya nga walay insurhensiya, ang pagmugna sa Sentrong Alyansa ng Mamamayan Para sa Bayan (SAMBAYANAN) gisugyot atol sa maong tigom.

Ang Sambayanan maoy tahasan sa pag-institutionalize ug pag-amgo sa hiniusang peace framework ug mga tumong sa National Task Force to End Local Communist Armed Conflict (NTF-ELCAC) aron masumpo ang terorismo ug malinglahon nga mga laraw sa communist terrorist groups (CTGs).

Isip usa ka multi-sectoral nga organisasyon, ang Sambayanan magsilbi nga campaign  ug advocacy center  nga nagpasiugda sa reform-centric, kolaborasyon ug malinawon nga paagi sa pag-asdang sa interes sa katawhang Pilipino ug pagsalikway ug pagsukol sa terorismo, malinglahon ug bangis nga armadong rebolusyon sa CPP-NPA-NDF.

Ang pagmugna sa Sambayanan giaprobahan atol sa tigom nga gipangulohan ni Bise Gob. Dionisio Victor Balite, isip acting chairman kon wala si Aumentado nga nitambong sa pagdungog sa kongreso ug Senado sa mga kalamboan sa Chocolate Hills.

Si Balite miingon nga ang Sambayanan mahimong mahinungdanon sa mga paningkamot sa Bohol nga magpabiling walay insurhensiya ug mamenosan ang risgo sa kapintasan.

Samtang ang mga surrenderee sa Kauban sa Reporma (KR) nakadawat og kinatibuk-ang P860,000 niadtong Pebrero 12 diin maoy mga benepisyaryo sa ikaduhang financial turnover nga mikabat sa P610,000 atol sa Provincial Peace Day niadtong Marso 26 diin ang matag indibidwal makadawat og P10,000.

Gihagit ang kalinaw sa lalawigan niadtong Pebrero sa dihang ang mga tigpatuman sa balaod nakigsangka sa mga salin sa rebeldeng grupo nga nagtinguha nga makabalik sa ilang kanhing mga puloy-anan sa lungsod sa Bilar.

Ang mga apektadong residente gihatagan og tabang lakip na ang psychological debriefing sa mga ahensya sa gobyerno lakip na ang Office of the Provincial Social Welfare and Development.

Ang mga bakwit nakadawat og food packs, basic necessities ug saktong pag-atiman pinaagi sa Critical Incident Stress Debriefing (CISD) alang sa 26 ka mga indibidwal.

Ang mga pamilya sa mga armadong rebelde nga napatay sa engkwentro gipalugwayan tabang kauban ang mga nangamatay ug nasamdan nga mga tigpatuman sa balaod sa pagkahuman sa engkwentro. (ECB/PIA7-Bohol)