TAGBILARAN CITY, Bohol (PIA) -- Nagkaproblema ba kamo sa mga buak nga botelya ug kadtong mga dili dawaton nga botelya sa mga basurahan?

Ngano nga dili man sundon ang gibuhat sa Tubigon?

Didto sa tigum aron i-update na ang Provincial Ecological Solid Waste Management Plan, gipaambit sa Tubigon ang ilang kasinati-an aron mahimo usab nga kapanghinaminan sa ubang local government units (LGUs)  nga nagkaporoblema na usab og sugod sa mga botelya nga nagkadaghan sa mga labayanan sa basura.

Sa Tubigon, ang mga botelya labi na kadtong dili na dawaton sa mga mamalitay og mga basura sa mga kabalayan, dugmukon gamit ang glass pulverizer, aron mahibalik sa iyang natural nga porma ug dili na makasamad.

Ang pulverizer, usa ka makina nga kabahin sa mga makina nga makatabang sa paghipos sa basura.

Dinhi, daghan na nga pwede himoon, sama sa ibulibod og balik sa mga kabaybayonan nga nangadaut kay sa iyang natural nga dagway, ang bildo, mahimo ra nga pino nga bonbon, ug mga gagmay nga tipaka nga dili na makasamad.

Gani, dire sa Tubigon, Bohol, ang gipulpog nga botelya nga nahimong bildo, gisagol na sa sahog sa hollow blocks nga ilang gitawag og eco-bricks.

Sa pakig-ambit ni Ferdinand Raganas, ang solid waste management focal person sa Tubigon, milagda ang lungsod sa pagpakigpartner sa Apo Cemex Corporation aron ang lungsod ug ang iyang programa sa diversion sa basura aron makunhuran ang ilabugay sa sanitary landfill, nga magpadali niini nga mapuno.

Ang proyekto sa eco-hollow blocks nahisakop sa Municipal Ordinance No 2020-07-507A.

Kay ang botelya dili nadawaton sa mga sanitaryt landfills tungod kay pwede pa kin inga irecycle, sa nagkadaghan nga botelya nga basura, nahimo kining daku nga suliran, angkon ni Mayor William Jao.

Dala niini, nakahunahuna ang lungsod nga maghimo og eco-hollowblocks gamit ang pinulpog nga botelya, saysay ni Raganas.

Dinhi, gamit ang 10 ka taro nga bonbon, 8 ka taro nga pinulpog nga botelya ug usa ka sako nga semento, mahimo ang kapin kon kulang 60 ka piraso nga eco-hollow blocks.

Kini karon ang gibaligya sa tag P18 ang buok, lig-on ug pulido nga gamit sa pagpatukod sa balay.

Sa mga buot mosaksi unsaon kini paghimo, bisitaha ang Materials Recovery Facility sa Tubigon aron usab masundog ang Sistema didto sa pagpakunhod sa basura nga ihatud ngadto sa Metro Cluster Albur Sanitary Land Fill.

Ang Eco-hollow block sa Tubigon, nahilakip sa mga best practices sa ESWM sa Bohol. (RAHC/PIA7 Bohol)