TAGBILARAN CITY, Bohol (PIA) -- Ang danyos sa sektor sa agrikultura sa probinsiya tungod sa El Niño phenomenon nikabat sa P31 milyones nga marka, matud pa sa Office Provincial Agriculturist (OPA) adlaw’ng Biyernes.

Base sa ilang hiniusang report gikan sa walo ka local government units (LGUs) – Sevilla, Valencia, Catigbian, Sierra Bullones, San Miguel, Trinidad, Bien Unido ug Carlos P. Garcia niadtong Abril 11, ang kinatibuk-ang danyos sa pagkakaron nikabat sa P31,282.967.09.

Namulong atol sa The Capitol Reports niadtong Abril 12, si OPA head Liza Quirog niingon nga 95 porsyento sa kadaot anaa sa produksyon sa humay ug ang nahabilin sa mais ug high value crops.

Gibutyag ni Quirog nga ang pagkawala sa produksiyon sa 123 ka ektarya walay tsansa nga maulian.

Kahinumduman nga atol sa first quarter meeting sa Provincial Disaster Risk Reduction and Management (PDRRM) Council, gimandoan ni Gobernador Erico Aristotle Aumentado ang mga hingtungdan nga ahensya sa pagpahigayon og cloud seeding operations karong buwana.

May kinatibuk-ang P7.5M diin P2.5M ubos sa Disaster Fund sa PDRRMO ug P5M gikan sa Bureau of Soils and Water Management sa Department of Agriculture ang gigahin alang sa cloud seeding activity.

Samtang gitaho ni provincial veterinarian Dr. Stella Marie Lapiz ang mga hayop nga  namatay tungod sa heat stroke gikan sa lungsod sa Bien Unido ug ubay-ubay nga insidente sa mga sintomas sa heat stroke sa mga hayop sa tibuok probinsya ang natala.

“I hope, I pray nga dili ta mag declare og state of calamity with all the measures undertaken, led by the office of the governor through the El Nino Task Force,” si Dr. Anthony Damalerio, PDRRM officer ug vice chair of the Task Force miingon.

Gitukod sa gobernador ang task force human sa pagpahayag sa PAGASA sa El Niño sa miaging tuig, diin gitudlo ni Aumentado si provincial administrator Asteria Caberte isip chair ug Si Atty. Filipina Asoy-Piollo, chief of staff, isip vice chair uban ni Damalerio.

Si Damalerio miingon nga ang kagamhanang probinsiyal maoy nag-una sa sitwasyon, pinaagi sa impormasyon pagsabwag ug dinaliang interbensyon sa mga sektor sa panglawas, agrikultura, DRRM, ug uban pa.

Nanawagan usab siya alang sa mga lakang sa pagkonserba sa tubig uban ni Aumentado nga gilauman nga magpagawas og usa ka direktiba sa cascade preparedness samtang ang PAGASA nagtagna sa pagpadayon sa El Niño phenomenon hangtod sa Hulyo. (ECB/PIA7 Bohol with reports from PIMO)