MANILA, April 2 (PIA) -- Giproklamar ni Presidente Ferdinand R. Marcos Jr. ang Hulyo 17 sa matag tuig isip “National Cardiopulmonary Resuscitation Day” (National CPR Day) sa tinguha nga isilsil ug ipasiugda ang nasudnong kampanya sa pagpahibalo sa panglawas sa matag panimalay sa mga Pilipino.
Sa duha ka pahina nga Proclamation No. 511 nga gilagdaan ni Marcos niadtong Marso 27, gipasiugda niini nga ang cardiopulmonary resuscitation (CPR) usa ka pamaagi sa pagluwas ug kinabuhi nga mapuslanon sa daghang emerhensya, lakip na ang atake sa kasingkasing o duol sa pagkalumos.
“There is a need to instill and continuously promote health consciousness among Filipinos by equipping them with the necessary information, knowledge, behavior, and skills to respond to health emergencies, including bringing CPR in every home as an emergency procedure," matud pa ni Marcos.
(Adunay panginahanglan sa pagsilsil ug padayon nga pagpalambo sa kahimatngon sa kahimsog sa mga Pilipino pinaagi sa pagsangkap kanila sa gikinahanglan nga impormasyon, kahibalo, pamatasan, ug kahanas sa pagtubag sa mga emerhensya sa panglawas, lakip ang pagdala sa CPR sa matag panimalay isip usa ka emergency nga pamaagi.)
Ang Presidente miingon nga ang Department of Health (DOH) maoy mangulo sa pagplano, pagpangandam, koordinasyon, organisasyon, pagpatuman, pagmonitor ug ebalwasyon sa mga inisyatiba ug mga programa sa tinuig nga pagsaulog sa National Cardiopulmonary Resuscitation Day.
Ang tanang ahensya sa gobyerno ug uban pang instrumentalidad gimandoan sa aktibong pag-apil sa pag-obserbar sa National Cardiopulmonary Resuscitation Day samtang ang mga non-government organizations ug ang pribadong sektor gidasig sa pagbuhat niini. (ECB/PIA7-Bohol)
