LUNGSOD NG CALAPAN, Oriental Mindoro (PIA) – Nakiisa si Senador Imee Marcos sa Department of Social Welfare and Development (DSWD) sa pamamahagi ng educational assistance sa mga estudyante ng Mindoro State University (MinSU) na isinagawa sa Activity Center sa Calapan City Campus noong Abril 21.
Sa harap ng 1,000 mag-aaral ng nasabing paaralan, sinabi ng senadora na katuwang niya ang DSWD sa pamimigay ng P5M financial assistance na kung saan tatanggap ang bawat isa ng P5,000 bilang bahagi ng programa na Assistance to Individuals in Crisis Situation (AICS).
“Humahanga ako sa mga Mindoreño na sa kabila ng mga dumaang sakuna at kalamidad sa inyong probinsiya ay nananatili pa rin kayong nakatayo at masaya. Kaya naman, buo pa rin ang suporta ng pamahalaan na tumulong sa inyong mga mag-aaral na makapagbigay ng kahit kaunting ayuda para maipagpatuloy ang inyong pag-aaral at matupad ang inyong pangarap sa buhay,” mensahe ni Marcos.
