TAGBILARAN CITY, Bohol (PIA) -- Ang probinsya sa Bohol ug ang United States Peace Corps naglaraw og dugang partnership.
Kini human giabiabi ni Gobernador Erico Aristotle Aumentado si US Peace Corps country director Marguerite Roy atol sa courtesy visit niini sa Kapitolyo adlaw’ng Lunes, Abril 15.
Nagpasalamat si Roy sa iyang gihulagway nga “a lovely reception” atol sa ilang pag-abot sa lalawigan.
Gipasabot niini nga sila naghinam-hinam nga maka-trabaho ang kagamhanang probinsiyal nga magpakita sa buhat ug sa best practices sa Peace Corps sa probinsiya.
Ang lima ka adlaw nga pagbisita maghatag usab og kahigayonan sa pagpalapad sa ilang panag-uban kung asa kini gikinahanglan, matud pa ni Roy.
Sa pagkakaron, pito ka mga boluntaryo sa peace corps ang na-assign sa Bohol, nga nalambigit sa social work, education, marine conservation, youth in development, health, agriculture, environment ug economic development sectors.
Apil niini si Alyssa Jones nga nagtrabaho sa Bohol Crisis Intervention Center (BCIC) sa kagamhanang probinsiyal.
“My fellow volunteers told me I hit the lottery in Bohol, that I’m the luckiest to be trained in the Philippines and in Bohol,”
Gisultihan ko sa akong mga kauban nga boluntaryo nga nakadaog ko og lotto sa Bohol, nga ako ang labing swerte nga nabansay sa Pilipinas ug sa Bohol,” matud pa ni Jones, nga nagpahayag sa iyang pasalamat sa kainit ug kabuotan nga iyang nasinati sa upat ka buwan nga siya nia dinhi.
Ang gobernador sa iyang bahin nagpasalamat usab sa US Peace Corps sa pagpili sa probinsiya samtang malipayon niyang nahinumdom nga nakig-ambit siya sa usa ka lawak sa ilang balay uban sa usa ka boluntaryo niadtong tuig 2001 sa dihang sila usa sa mga host family.
Si Boni Bucol, training director, nitaho nga 60 o 70 pa ka mga boluntaryo ang gipaabot nga e-assign sa nasod karong Hulyo ning tuiga.
Ang US peace corps nagtanyag og mga oportunidad sa serbisyo sa labaw sa 60 ka mga nasud diin ang mga boluntaryo nagpuyo ug nagtrabaho kauban ang mga miyembro sa komunidad sa lokal nga prayoridad nga mga proyekto, pagtukod og mga relasyon, pagbayloay sa mga kultura ug kahibalo, ug pagtabang pagbag-o sa kinabuhi sa mga henerasyon. (ECB/PIA7-Bohol)
