TAGBILARAN CITY, Bohol (PIA) -- Nipasidaan ang Department of Budget and Management (DBM) sa publiko batok sa mga mangingilad nga nagpakaaron-ingnon nga konektado sa departamento ug nagtanyag og mga kontrata sa gobyerno baylo sa salapi.

Ang DBM nipagawas sa pasidaan human nasikop sa National Bureau of Investigation (NBI)  ang walo ka giingong scammers sa entrapment operation niadtong ulahing bahin sa Marso.

Ang walo giingong kabahin sa scam sa pagsaad sa mga umaabot nga contractor og binilyon ka pesos alang sa mga proyekto sa gobyerno sa P500,000 nga suborno.

Ang scam nadiskubrehan human ang posibleng biktima misusi sa DBM ug nasuta nga ang giingong budget official nga nagtanyag sa deal dili konektado sa departamento ug ang proyekto nga gitanyag wala maglungtad.

“Mariin po nating kinokondena ang ganitong klaseng gawain. Kapag may mga ganitong klase ng tao na lumapit sa inyo at sasabihing kaya nilang magpalabas ng pondo mula sa DBM, i-report po ninyo kaagad sa kinauukulan," matud pa DBM Kalihim Amenah Pangandaman sa usa  ka pahayag.

Ang mga awtoridad mosang-at og mga reklamong Estafa ug Usurupation of Authority batok sa walo ka mga suspek, matod sa DBM.

Ang publiko mahimong magpadala og mga taho o reklamo sa DBM public assistance office (public_assistance@dbm.gov.ph), sa 8657-3300 local 2524 hotline niini, ug pinaagi sa Usapang Budget Natin Facebook page.

Ang DBM nagkanayon nga ang mga reklamo mahimo usab nga idirekta sa NBI pinaagi sa 8523-8231 ngadto sa 38. (ECB/PIA7-Bohol)