TAGBILARAN CITY, Bohol (PIA) -- Ang mga trabahante sa pribadong sektor nga motrabaho sa Abril 9 (Araw ng Kagitingan o Day of Valor) ug Abril 10 (Eid'I al-Fitr) o ang katapusan sa Ramadan adunay katungod sa 200 porsyento sa ilang sweldo sa matag adlaw sa parehong regular nga holidays.
Sa gipagawas nga Labor Advisory No. 05 nga giluwatan niadtong Biyernes, ang Department of Labor and Employment (DOLE) nipahinumdom sa mga amo nga sundon ang mga lagda sa sweldo.
Ang 200-porsyento nga sweldo naglangkob sa unang walo ka oras (basic wage times two).
Sa subra sa walo ka oras, ang DOLE nag-ingon nga ang amo mobayad sa empleyado og dugang 30 porsyento sa hourly rate (hourly rate sa basic wage times 200 percent times 130 percent times number of hours worked).
Ang empleyado nga motrabaho atol sa regular holiday nga maatol usab sa iyang rest day, makadawat og dugang 30 porsiyento sa basic wage nga 200 porsyento (basic wage times 200 porsyento x 130 porsiyento).
Ang sobra sa walo ka oras atol sa regular holiday nga natunong usab sa adlaw sa pagpahulay sa empleyado, ang overtime pay kwentahon sa hourly rate sa basic wage times 200 percent times 130 percent times number of hours worked.
Kung ang empleyado dili motrabaho, ang amo mobayad sa 100 porsyento sa suholan sa empleyado alang sa maong adlaw, basta ang empleyado mo-report sa pagtrabaho o anaa sa leave of absence nga may sweldo sa adlaw sa dili pa ang regular holiday.
Kung ang adlaw sa wala pa ang regular holiday usa ka non-working day sa establisemento o ang gikatakda nga rest day, ang empleyado adunay katungod sa holiday pay kung siya mo-report sa trabaho o anaa sa leave of absence nga adunay bayad sa adlaw dayon sa wala pa ang adlaw nga walay trabaho o adlaw sa pagpahulay.
Ang Day of Valor pagtimaan sa mga sundalo nga nakig-away ug namatay alang sa kagawasan batok sa mga mananakop nga Hapon sa Battle of Bataan niadtong 1942.
Ang Eid'I al-Fitr maoy usa sa duha ka dagkong pangilin sa Muslim ug nagsaulog sa pagtapos sa tibuok buwan nga Ramadan sa kaadlawon hangtod sa pagsalop sa adlaw nga pagpuasa. (ECB/PIA7-Bohol)
