TAGBILARAN CITY, Bohol (PIA) -- Mas gipalig-on sa Provincial Inter-Agency African Swine Fever (ASF) Task Force ang border control sa pagdili sa pagpagawas sa mga buhing baboy, karneng baboy, ug mga produkto sa baboy gikan sa isla sa Panglao.

Kalabot niini, gipatuman sugod ala 1:00 sa pales adlaw’ng Martes, Abril 23, ang traffic re-routing paingon ug pagawas sa isla sa Panglao.

Ang Causeway Bridge alang sa mga sakyanan nga mosulod sa isla sa Panglao.

Samtang ang Jacinto Borja Bridge (Junction) mogamit og usa ka lane alang sa pagsulod sa Panglao.

Ang nahibilin sa tulo ka lane sa Borja Bridge/Junction, diin ang primary ug secondary ASF Border Control points sa mga tigpatuman sa balaod nahimutang, ipahinungod sa mga sakyanan nga mogawas sa isla sa Panglao.

Kini alang sa higpit nga pagpatuman sa pagpugong sa sakit pinaagi sa pagkontrol sa utlanan tungod sa mga kumpirmadong kaso sa ASF.

Ang Panggamhanan sa Probinsiya sa Bohol nag-awhag sa tanang mga Boholano nga makigtambayayong sa mga protocol nga gimando sa Executive Order 13 nga gilagdaan ni Gobernador Erico Aristotle Aumentado.

Kini nagdili sa pagbalhin sa mga buhing baboy, karne, ug uban pang mga produkto nga may kalabotan sa baboy gikan sa isla sa Panglao paingon sa mainland Bohol, tungod sa gidudahang mga kaso sa ASF sa pipila ka barangay sa Dauis.

Ang kagamhanang probinsyal nagpabiling komitado nga mahimong aktibo ug mabinantayon sa pagpanalipod sa industriya sa kahayupan ug manok aron masiguro ang seguridad sa pagkaon sa probinsiya pinaagi sa gipakusog nga monitoring ug surveillance aron mapugngan ang posibleng sakit nga mokaylap sa ubang mga mainland areas. (ECB/PIA7-Bohol)