DAVAO DE ORO (PIA) -- Mideklara si Presidente Ferdinand R. Marcos Jr. og whole-of-government approach aron maseguro ang seguridad sa pagkaon ug saktong nutrisyon sa tinguha nga makabot ang zero hunger ug nutrition security sa Pilipinas ubos sa Philippine Development Plan 2023-2028 sa administrasyon.

Sa duha ka pahina nga Memorandum Circular No. 47 nga gipirmahan ni Executive Secretary Lucas Bersamin niadtong Abril 19, gimandoan ni Presidente Marcos ang tanang ahensya sa gobyerno ug giawhag ang tanang local government units (LGUs) sa pagsuporta sa pagpatuman sa Enhanced Partnership Against Hunger and Poverty (EPAHP) na programa.

Ang EPAHP usa sa mga programa sa bandila sa Task Force on Zero Hunger, nga nagtumong sa pag-institutionalize sa mga paningkamot sa pagpagaan sa kagutom ug pagpalambo sa seguridad sa pagkaon ug nutrisyon pinaagi sa pagsumpay sa mga Community Based Organizations (CBOs) ngadto sa umaabot nga mga merkado ug paghatag og tabang sa kredito aron suportahan ang produksyon sa pagkaon, pagproseso ug pag-apod-apod.

Ang task force gimanduan usab sa pagpauswag sa probisyon sa mga teknolohiya sa produksiyon sa umahan ug pagpalapad sa mga serbisyo sa mga umahan sa pamilya nga gitabangan sa gobyerno ug mga organisasyon nga nakabase sa kabanikanhan, ingon man pagpauswag sa pagpadayon sa Programa sa EPAHP pinaagi sa pagpatuman sa mga palisiya nga moapil sa pribadong sektor, ug pag-institutionalize sa mga mekanismo sa LGUs.

Gimandoan usab ang pagsagop sa Community Participation Procurement aron dasigon ang mga CBO sa pag-apil sa EPAHP Program, ug pagtukod, pag-ayo ug pagpalambo sa mga pasilidad sa irigasyon ug mga estruktura sa irigasyon sa mga lugar sa kabanikanhan.

Ang kopya sa MC 47, nga epektibo dayon, anaa sa Opisyal nga Gazette. (PND/Translated by JSD/MLU)