ILIGAN CITY (PIA) -- Isip kabahin sa pagtapos sa selebrasyon sa Civil Society Organizations (CSOs) month, gipasiugda sa mga sakop sa Iligan City People's Council (ICPC) ang ilang mga serbisyo ug programa pinaagi sa usa ka fair.
Naghatag og plataporma ang fair aron mabida ang mahinungdanong papel sa mga CSO sa komunidad isip mga tigtampo sa kalamboan ug kalinaw sa syudad. Pipila sa ilang mga programa naglakip sa peacebuilding ug conflict transformation, disaster response, community development, human rights advocacy, health, education, ug daghan pa.
Gipasiugda ni Mayor Frederick Siao ang mahinungdanong tahas sa mga CSO sa pagsuporta sa gobyerno sa paghimo og mga importanteng desisyon pinaagi sa paghatag og mga ideya nga dili makit-an sa mga lider sa politika.
"Unsay mahitabo sa syudad kung magkanya-kanya ta? Makita karon with our cooperation ang intention of this admin is very noble, naa tay direction, naay development goals na gusto nato i-fulfil. Ang maayo ani, maayong communication, cooperation, collaboration, importante kaayo sa society, nga kung walay communication, collaboration asa man paingon, lahi-lahi direction," he said.
Sumala sab ni konsehal Maria Paz Teresa "Betsy" V. Zalsos, importante ang pakigtambayayong sa mga CSO aron mapaabot ang tingog sa katawhan sa lokal nga kagamhanan.
Samtang si ICPC chairperson Abel Moya, gitumbok ang ka-importante sa panaghiusa ug pagtinabangay sa mga CSO. .
“This is also an opportunity for us, CSOs, to build and rebuild our relationships. For any other organizations, we also have dynamics. But this gathering provides us with the opportunity to reconnect, connect, and build relationships because our strength comes from within us,” sumala niya.
Gipamatud-an usab niya ang pasalig sa council sa pagsuporta sa siyudad sa pagkab-ot sa 15 nga Iligan Developmental Goals. Kini nga mga tumong naglangkob sa 15 ka punto nga legislative agenda nga gitumong sa pagsulbad sa dagkong mga isyu, lakip na ang pagpalambo sa serbisyo sa panglawas sa publiko, pagpalagsik sa mga negosyo, ug pagsiguro sa igong suplay sa tubig alang sa mga barangay ug uban pa. (LELA, PIA Region 10 -Lanao del Norte)