DUMAGUETE CITY, Negros Oriental (PIA) -- Gibuksan sa Kagamhanan sa Dakbayan sa Dumaguete ang Streetfood Night Market na nahimutang sa may Katada St., sulod sa tiangge isip bag-ong tourist attraction sa mga hilig og food trip magabie.

Matilwan dinhi ang nagkadaiyang putahe gikan sa mga lutong bahay, mga sinugba, pritong manok, ug uban pang klase sa street foods.

Gitapok sa Kagamahanan sa Siyudad ang mga naninda kilid sa merkado magabie ug gipahiluna sila atbang sa mga Painitan stall sa tiangge aron aduna silay insaktong pwesto alang sa pagbaligya sa ilang mga produkto.

Parte ni sa mga programa sa dakbayan alang sa pagpalig-on sa turismo a siyudad.

“Sa ubang mga lugar na akong naadtuan especially sa abroad, uso kaayo nang night market. Dili nato usikan ang kagabhion kay naa pay daghan tawo na gusto magsuroy-suroy, magpalit, maglingaw-lingaw sa gabie,” matud ni Dumaguete City Mayor Felipe Remollo.

“Gusto nato tabangan ang tanan mga vendor. Palambuon nato ni. Gipa-design na nato sa city engineer. Ato ni pa-atupan. Kaning wala gasiga na suga pasigahon. Gwapuhon nato ni,” dugang pa niya.

Gibuksan ang Streetfoood Night Market sa publiko kaniadtong ika-12 sa Abril.

Kauban ni Remollo sa maong kalihukan ang pipila ka opisyal sa lungsod.

Matud ni Felipe Remollo gitapok sa siyudad ang kaning mga manindahay sa usa ka lugar aron dumdumon sila sa katawhan ug pinaagi niini gibana-bana sa kagamhanan na mas modako pa ang ilang ginansya sama sa nahitabo sa mga  namaligya og tempura ug mga tigmasahe sa Pantawan Area sa Rizal Boulevard.

Gipaambit sab ni Remollo na libre ang paggamit sa ilang pwesto sa tiangge sa unom ka bulan aging tabang sa mga manindahay.

Abre ang streetfood night market sugod ala sais sa gabie hangtod tunga-tunga sa gabie. (RAL/PIA7 Negros Oriental)