MANILA (PIA) -- Gipasaligan ni Presidente Ferdinand R. Marcos Jr. ang publiko niadtong Lunes, Abril 29, sa mga plano ug estratehiya sa gobyerno aron makontrol ang presyo sa kuryente taliwala sa taas nga panginahanglanon sa kuryente karon.

Ang Presidente mihimo sa pamahayag atol sa usa ka media interview sa Pikit, Cotabato, diin niingon kini nga walay artipisyal nga krisis sa power sector.

Ang naa sa nasud, matod niya, usa ka power system overload tungod sa dry spell.

Ang gobyerno padayon nga nagmonitor sa sitwasyon tungod sa pagsaka sa panginahanglan, ang Presidente miingon, nga nagpasalig sa katawhan nga ang gobyerno mohimo ug mga lakang sa pagkontrolar sa presyo sa kuryente.

“Ang naging consumption natin biglang tumaas talaga dahil napaka init. Kaya’t nakabantay kami ng husto. Kaya naman nagkakaroon ng problema sa mga iba’t ibang sistema kaya namin tinututukan,” giingnan ni Presidente Marcos ang mga tigbalita.

“At ‘yung pagtaas ng [presyo]— mayroon kaming mga plano, mga strategy para hindi na magtaas ng presyo ng kuryente. At least for now, in this crisis time,” ingon niya.

Usa sa mga giduso karon, matud niya, mao ang pag-awhag sa National Grid Corporation of the Philippines (NGCP) sa paghimo sa mga transmission lines nga gisaad niini nga mopakusog sa gikinahanglang kuryente ilabi na sa mga dapit nga dili konektado sa grid.

Ang Presidente didto sa Cotabato aron mangulo sa inagurasyon sa Malitubog-Maridagao Irrigation Project Stage II (MMIP II). (ECB/PIA7-Bohol)